DARALO 62 - WUKE SUSI WATTI'U AL᷊AL᷊USASSA

Mangngimanna su lal᷊u'addu Ruata

¹ Su piaṛṛa'u mangangantari. Tumuṛṛuttu: Yedutun. Daralon Daud.

² Ringannu matammuda niawa'u uaṛṛaddo Ruata, tumba'u wuassi Tou sassane asasal᷊ama'u.

³ Tumba'u i Tou apan ual᷊u'adda wuṛṛu manal᷊amatta si ya'u, i Tou mananambaa'u, i ya'u tawe umio'a.

⁴ Sara tingngera i yamiu sarangkanambone maapulu mamangalo sangkatou taumata apan erete darandunga uasoṛṛa wuṛṛu pale apan maraniten maṛṛa'a?

⁵ I yamiu tumba'u pia pandumma mangema'i tou, wuassu aiananne apan matanggakka. I yamiu apulune mangngawusu; ringannu moṛongngu i yamiu mangngal᷊amatta, arawe sulal᷊ummu naungngi yamiu mammontoga.

⁶ Ringannu matammudda niawa'u uaṛṛaddo Ruata, tumba'u wuassi Tou asasal᷊ama'u.

⁷ Tumba'u i Tou ual᷊u'adda wuṛṛu nanal᷊amatta si ya'u; i Tou mananahe'u, i ya'u tawe umio'a.

⁸ Ete i Tou Ruata apan nangonggolu asasal᷊amatta wuṛṛu aaddata si ya'u, ete i Tou pattillumangku wuṛṛu mananahe'u apan matohassa.

⁹ Ei walahangku, pangantimpe Ruata suapan tempo; sabbanga'e lal᷊oṛṛon naungngu si Tou, ana waugu ete i Tou tampa passirunganni ite.

¹⁰ Taumata tumba'u ere singangu paassa isangngo, wahewalla addio'a uasul᷊ungnga tawe aregane. Amungkangu itimbanga, i mangitou maṛṛanna, maṛṛannanna wuassu singangu paassa isangngo.

¹¹ Arie pangantimma hessin pamamahia, wuṛṛu arie mangasakku saranapa niaṛṛo. Ewe'e lai amungkangu paa'alanu niatambanna, arie naungngu mattundeeta si tou.

¹² Paapirate i ya'u naaringikka Ruata mabbisara manungku taṛṛino darantane wuassi Tou,

¹³ wuṛṛu manungku i Tou sidutu mandangngu. I'o, oh Mawu, mabbal᷊issa al᷊awo'u taumata tumuṛṛuttu pallal᷊agune.