DARALO 59 - WUKE SUSI WATTI'U AL᷊AL᷊USASSA

Aal᷊iomanna sumal᷊ande tatillumma

¹ Su piaṛṛa'u mangangatari. Tumuṛṛuttu antari: Imbaṛṛangnga manggohakka. Daralo wuassi Daud, sutempo i Saul nandolokku taumata iapariagga wal᷊ene tadea'u mapamate si tou.

² Oh Ruata'u, sal᷊amatewe i ya'u wuassu manga see'u, riagaiwe i ya'u su saruannu taumata apan mammangalo si ya'u.

³ Pallosaawe i ya'u wuassu taumata apan ma'ola'a al᷊al᷊eo, liuaawe i ya'u wuassu manga taṛṛa pate.

⁴ Pa'ellege, i mangitou nangampanga tadea'u mamate si ya'u, manga taumata maṛagissa naammula lumawangnga si ya'u; sumbal᷊i wal᷊ine ana waugu i ya'u buatte na'ola'a rosa i ya'u nilumawangnga, oh Mawu.

⁵ Wal᷊ine lai ana waugu pasasal᷊a'u, i mangitou uasasaṛṛawutta wuṛṛu uasasadiate.

⁶ Darisikke, Ruata Apan Atanggaṛṛanne, ontol᷊ete i ya'u. Oh Ruatan Israel, pa'ellege sassane. Darisikke wuṛṛu ṛuumana'e manga walahanna, arie umakkannu taumata lal᷊eo apan sidutu mandal᷊eo.

⁷ Sutempo wawallo i mangitou nabbelenga, tuttawanna naal᷊ihidda asu lapiddu mammal᷊iwutta soa.

⁸ I mangitou sidutu mammasendekka wuṛṛu mallobbosa; manga wisaran mangitou maṛṛoro naal᷊ihidda hal᷊ele, i mangitou massunna manungku taweddu maaringikka.

⁹ Arawe I'o nilumaggen mangitou, oh Mawu, anambon walahanna udde nial᷊uandahan-Nu.

¹⁰ Ete I'o atatoha'u, i ya'u uaantimma Si'o, I'o tampa tatal᷊angangku, oh Ruata.

¹¹ Ana waugu apapia-Nu Ruata'u nirumanta ringangku, I Tou namala'u nabbiala see'u niawaddo.

¹² Ariewe mamate si mangitou, oh Mawu, tadea'u walahangku tawe maabul᷊i. Sal᷊iawuṛṛa'e wuṛṛu waddoa'e i mangitou ringannu taṛṛino-Nu, oh Mawu mallal᷊u'addi yami.

¹³ Ana waugu i mangitou u'al᷊iomanna ringannu manga wisaran mangitou; wala'e i mangitou iasongngan awawungane, ana waugu i mangitou apulune mammontoga wuṛṛu mammahia.

¹⁴ Patete i mangitou sulal᷊ummu asasa'u-Nu, oh Ruata, patete i mangitou ma'oman sara masue. Ne suapan taumata sarun maasingkatta manungku Ruata uaparenta Israel, wuṛṛu pamamarenta-Ne lai sara su ahewalu runia.

¹⁵ Sutempo wawallo i mangitou nabelengnga, tuttawanna naal᷊ihidda asu lapiddu mammal᷊iwutta soa.

¹⁶ I mangitou mammal᷊intadda maddea'a anna, wuṛṛu lullallu amungkangngu tawe nal᷊aidda.

¹⁷ Arawe i ya'u mangngantari su ola'u atatohassu Mawu; suapan marua allo i ya'u mangngantari ringannu ma'ikkata su ola'u darangngu wuṛṛu paddul᷊i-Nu. Ana waugu ete I'o tampa tatal᷊angangku, tampa i ya'u mattillumma sutempon asasusa.

¹⁸ Oh Ruata, atatoha'u, i ya'u mangngantarin daralo Si'o, ana waugu ete I'o tampa pattillummangku, oh Ruata, darangngu'u.