DARALO 55 - WUKE SUSI WATTI'U AL᷊AL᷊USASSA

Aal᷊iomanna sumal᷊ande tatillumma su saruannu seetta

¹ Su piaṛṛa'u mangangantari. Ringannu nanalangnge kecapi. Antari al᷊aṛṛa'i Daud.

² Oh Ruata, daringiṛṛewe aal᷊iomangku, ariewe tawe maddaringikka sasal᷊ande'u.

³ Intannoiwe i ya'u wuṛṛu simbaṛṛewe i ya'u, i ya'u naṛimunsa'a ana waugu asasusa'u.

⁴ Naungku sussinggawanga ana waugu iwabbansagu seetta, wuṛṛu pangangallangu taumata lal᷊eo. Ana waugu i mangitou mapasusan wia'u, wuṛṛu ringannu massa'u maisasee'u.

⁵ Naungku tumaniten sussinggawanga, atata'uttu papate uarundinganna watangangku.

⁶ I ya'u aintaṛoannu sasinggawanga wuṛṛu atata'utta, aatongannu apendamma maṛṛaubba.

⁷ Ah, unnuwisara i ya'u pia papaidda ere merpati, i ya'u sarun tumalla'a maddea'a tampa mal᷊angngana.

⁸ Ore, i ya'u sarun tumalla'a parauanna, wuṛṛu mamanua su wadda'a.

⁹ I ya'u sarun masasaṛṛawutta maddea'a tampa pattulampinganna wuassu tandi'a wuṛṛu anginna ma'ikkata.

¹⁰ Oh Mawu, pawingioaawe manga see'u, songkaṛṛa'e hatton mangitou, ana waugu su soa i ya'u naasilo lal᷊awangnga wuṛṛu pabbawawul᷊o.

¹¹ Allo ṛabbi i mangitou mammal᷊iwutta, ma'ola'a al᷊al᷊eo wuṛṛu mandantan al᷊iba'ukka.

¹² Su al᷊awo'u tampa pia panggahohakka; pangangallanga wuṛṛu pallal᷊inga walate apulu su pasakka.

¹³ Unnuwisara seetta mapasal᷊a'u, i ya'u ta'e wotongnge maataṛṛangnga. Unnu wisara ro'appa mallobbossa si ya'u, i ya'u ta'e wotongnge mailal᷊inda'i tou.

¹⁴ Arawe i'o hawe'u, ringangku, hawe'u ate apan mandal᷊eo si ya'u.

¹⁵ Dorone i ite uahahawe ringannu mapia, wuṛṛu wotongnge mattaṛṛamawu suadio'a su Wal᷊en Mawu.

¹⁶ Wala'e see'u mate mal᷊ihakka wuṛṛu ta'e wiakka sumossokka su runian taumata nate, ana waugu al᷊al᷊eo uatana'a su wal᷊en mangitou, su pattangnganni mangitou.

¹⁷ Arawe i ya'u sumal᷊ande su Ruata, Mawu sarun manal᷊amatta si ya'u.

¹⁸ Allo ṛabbi i ya'u sussal᷊iomanna wuṛṛu lulluai, wuṛṛu i Tou naddaringikka tingi'u.

¹⁹ I Tou nanal᷊amatta si ya'u wuassu pangalon seetta, apan mangngelekka mammangalo si ya'u.

²⁰ Ruata mammarenta wuassu panattaṛṛanne sarun maddaringikka si ya'u wuṛṛu namaddon mangitou. Ana waugu i mangitou maddiri mawal᷊u, wuṛṛu tawe mata'uttu Ruata.

²¹ Hawe'u tabbe namangalo manga ringanne, i tou namal᷊u paairene.

²² Manga wisarane al᷊ussa massal᷊o'a, arawe sulal᷊ummu naungnge pia ararantinna. Wisarane masaṛṛionto'a, arawe mangngusu'a naal᷊ihidda hal᷊ele maṛṛoro.

²³ Tantil᷊a'e asasinggawangu su Mawu, ne i Tou sarun massumbada si'o; ana waugu taumata matul᷊idda tawe iwala-Ne iapawaddo.

²⁴ Arawe I'o, oh Ruata, sarun mamontolli mangitou sulal᷊ummu loṛṛangnga apan al᷊al᷊umanne. Manga taṛṛa l᷊inga wuṛṛu taṛṛa pate tawe mal᷊al᷊appa sambageanganna wuassu uukki mangitou. Arawe i ya'u mangngimanna Si'o.