DARALO 54 - WUKE SUSI WATTI'U AL᷊AL᷊USASSA

Aal᷊iomanna sumal᷊ande tatillumma

¹ Su piaṛṛa'u mangangantari. Ringannu nanalangnge kecapi. Aantari al᷊aṛṛa'i Daud,

² sutempo taumatan Zifi nirumanta namasingkatta si Saul, “Daud uaimbuni ringanni yami.”

³ Oh Ruata, sal᷊amatewe i ya'u ana waugu taṛṛino-Nu, onggol᷊eten atatul᷊idda si ya'u ana waugu atatohassu Mawu.

⁴ Daringiṛṛewe darorongku, oh Ruata, antimanna I'o maddaringikka manga wisara'u.

⁵ Ana waugu taumata raho naddisikka mamangalo si ya'u, taumata mawunga maapulu mamate si ya'u, i mangitou tawe mangantagu Ruata.

⁶ Arawe Ruata uddewe matatul᷊ungku; Mawu uddewe mananahe'u.

⁷ I Tou sarun makkuumannu see'u ringannu al᷊al᷊eon mangitou sassane, wuṛṛu mamate si mangitou ana waugu i Tou marangngu si ya'u.

⁸ Ringannu naungnga mal᷊uassa i ya'u nangonggolu sasamba Si'o, wuṛṛu naadiangkamanna Si'o, ana waugu I'o mapia, oh Mawu.

⁹ I ya'u buatte nipallossu Mawu wuassu al᷊awo'u asasusa, wuṛṛu naasilo see'u niawaddo.