DARALO 52 - WUKE SUSI WATTI'U AL᷊AL᷊USASSA

Ṛuumanna su taumata lal᷊eo

¹ Su piaṛṛa'u mangangantari. Aantari al᷊aṛṛa'i Daud,

² su tempo i Doëg taumatan Edom, nirumanta namasingkatta si Saul manungku i Daud na'omate su wal᷊en Abimelekh.

³ Ei taumata matohassa, anio i'o mammungan al᷊al᷊eonu, su taumata apan arangnguannu Ruata?

⁴ Su al᷊o'engngu allo i'o mallinga wuṛṛu manggol᷊agu al᷊al᷊eo; lilanu naal᷊ihidda lari'a aiṛṛi apan maṛṛoro.

⁵ I'o lembon marangngu al᷊al᷊eo wuassu apapia, mallutuanna mammahia wuassu mabbisara atonna.

⁶ Ringannu manga wisaranu i'o mammahia wuṛṛu mannaddu'a naungngu taumata!

⁷ Arawe i'o sarun pateannu Ruata sarangkal᷊o'engnge; i'o sametanna wuṛṛu wol᷊enganna wuassu wal᷊enu, wuṛṛu iapawul᷊i wuassu runian taumata wiakka.

⁸ Maasilo udde taumata susi sarun mata'utta, ana see lumaggenu wuṛṛu mabbisara,

⁹ “Eteudde taumatane apan tawe mattillumma su Ruata, arawe uaantimma paa'ala apan manambo wuṛṛu maddea'a atatammuda su darotongnga niaṛṛone.”

¹⁰ Arawe i ya'u naal᷊ihidda punnu alu zaitun apan nangelomma sulal᷊ummu Wal᷊en Ruata. I ya'u mangimanna manungku Ruata sidutu mandangngu saran mal᷊annu-l᷊annu.

¹¹ I ya'u sidutu maadiangkamanna Si'o su saruannu al᷊aṛṛanang-Ngu i ya'u mammasingkatu apapia-Nu.