DARALO 49 - WUKE SUSI WATTI'U AL᷊AL᷊USASSA

Tawe gunane mangngasakku paa'ala

¹ Daralon ṛuanganni Korah. Su piaṛṛa'u mangangantari.

² Paddaringikke, ei al᷊awo'u walahanna, tainga'e tal᷊inganu, ei tumana'u runia,

³ mawae ete taumata wiasa, ara'e lai taumata papunna, mawae taumata asiangnga, ara'e lai taumata ala.

⁴ I ya'u sarun mabbisara manga wisaran apande, addapattu ṛingirangku tumaniten mal᷊al᷊umma.

⁵ I ya'u sarun manutukka sasanato'a, wuṛṛu manualagu atappasanne lapiddu mannalangnga kecapi.

⁶ I ya'u tawe mata'utta sutempon asasusa, sutempo i ya'u pangaloannu seetta apan lal᷊eo.

⁷ I mangitou sarun mangasakku paa'alane, wuṛṛu mamungan darotongnge.

⁸ Mangke atonna tawe saran sangkatou apan wotongnge manal᷊amatta tuṛṛangnge, wuṛṛu mamaekka pasasal᷊ane su Ruata.

⁹ Sarangkanambone apan nionggola tawe maasuungnga; tumaniten masaggada areggan wawaekku niawane,

¹⁰ tadea'u i tou mal᷊iudda wuassu papate wuṛṛu mapabiakka sarangkal᷊o'engnge.

¹¹ Tawe, i tou sarun maasilo manungku taumata pande lai mate. Taumata longonna wuṛṛu woddo suadio'a nate, wuṛṛu manantangu darotongnge su taumata waine.

¹² I mangitou sarun matana'a su labbinga sarangkal᷊o'engnge; eteudde pamanuanni mangitou sarangkal᷊o'engnge, salaiwe dorone i mangitou uatahuanna manambo leta'a.

¹³ Taumata tawe maawiakka sidutu sulal᷊ummu paa'ala; naal᷊ihidda winatangnga, i tou lai sarun nate.

¹⁴ Etearoddi pal᷊addu taumata apan mangngasakku watanganne, wuṛṛu allo addantane su taumata apan nawusaten wisarane.

¹⁵ Naal᷊ihidda domba, i mangitou nitantunna iapaate; papate sarun maola'a mallal᷊u'addi mangitou. Marua allo i mangitou iawaddon taumata matul᷊idda; waddangi mangitou lapiddu mawukku'a su runian taumata nate, marau wuassu atatanaanna apan mal᷊uassa.

¹⁶ Arawe i ya'u sarun ipallossu Ruata, i ya'u sarun ipallossi Tou wuassu taṛinon papate.

¹⁷ Arie paata'utta amungkangu pia sangkatou mabbal᷊i ala, wuṛṛu darotongnge mabbal᷊i manambo.

¹⁸ Ana waugu sutempo nate i tou tawe mangapiddu manga apa, darotongnge iapidda suadio'a ringanni tou su labbinga.

¹⁹ Ewe'e amungkangu pia sangkatou naauntunga sulal᷊ummu pabbiaṛṛanne, wuṛṛu mangke raddaloanna ana waugu naauntunga,

²⁰ i tou sarun matuṛutta iupungngu al᷊amonane lai watukku tampa apan marandumma saran mal᷊annu-l᷊annu.

²¹ Taumata tawe maawiakka sidutu sulal᷊ummu al᷊al᷊uassa, naal᷊ihidda winatanga, i tou lai sarun mate.