DARALO 48 - WUKE SUSI WATTI'U AL᷊AL᷊USASSA

Sion, soan Duata

¹ Daralon ṛuanganni Korah.

² Mangke mawantuge Mawu wuṛṛu lembon raddaloanna su soan Duatan kite, su wuidda apan susi.

³ Sion, wuiddu Ruata matanggakka maṛṛansanga soan Ratu Mawantuga maal᷊uassa ahewallu runia.

⁴ Ruata uatana'a sulal᷊ummu wal᷊en araratuanna, ewe'e ete i Tou lai sassane mallal᷊u'adde Mawu.

⁵ Pa'ellege manga ratu uaammula; i mangitou nirumanta ana waugu mamangalo.

⁶ Arawe naasilo wuidda udde, i mangitou niagukke; i mangitou nata'utta wuṛṛu tinumal᷊angnga nial᷊iwune.

⁷ Poiaroddi i mangitou mangngindon atata'utta, naal᷊ihidda wawine apan mangunsiwete,

⁸ naal᷊ihidda apalla naṛṛimunsa'a su tandi'a.

⁹ Ere lai niaringiṛanni ite, orassa indi i ite naasilote, su Soan Mawu Apan Lembontaṛṛino. Soa uddewe Soan Ruatan kite, I Tou mannamba'a saran al᷊annu-l᷊annu.

¹⁰ Sulal᷊ummu Wal᷊en-Nu i yami mannaungnga darangngu-Nu, oh Ruata.

¹¹ Aran-Nu tinumelenga wuṛṛu raddaloannu ahewallu runia, I'o mammarenta ringannu atatul᷊idda.

¹² Wala'e tumana'u Sion wuṛṛu Yehuda lullala'a lulluassa, ana waugu I'o nakkuumannu ro'appi mangitou.

¹³ Pamal᷊iwutte Sion, pal᷊intara'e i tou, wuṛṛu reenga'e candine.

¹⁴ Panutukke darandungnge, parikisete tanda'a watune, tadea'u i yamiu wotongnge mabbatti'a su papapulunnu:

¹⁵ “Ete i Tou Ruata, Ruatan kite saran mal᷊annu-l᷊annu, i Tou sarun mamiaṛṛa'i ite sarangkal᷊o'engnge.”