DARALO 42 - WUKE SUSI WATTI'U AL᷊AL᷊USASSA

WUKE ARUANE: DARALO 42–72 Aal᷊iomanna su leta'a pinamuanganna

¹ Su piaṛṛa'u mangangantari. Antari al᷊aṛṛa'u ṛuanganni Korah.

² Naal᷊ihidda rusa maapulun ua'en sal᷊ukka, aroddi lai niawa'u maapulu-Nu, oh Ruata.

³ I ya'u mappulun Ruata apan wiakka, tingngera i ya'u wotongnge maataṛṛamawu su Wal᷊en-Ne?

⁴ Allo ṛabbi i ya'u lulluai, anna si ya'u tumba'u allon mata. Su al᷊o'engngu allo see'u maiwal᷊o, “Suapate Ruatanu?”

⁵ Naungku massusa napawe maanaungnga tempo dorone, sutempo i ya'u mattudda Wal᷊en Mawu suadio'a ringannu awadaalla apan mallaghun damea. I ya'u u'amatta su saruannu ammul᷊anna ringannu huggio wuṛṛu antarin daralo.

⁶ Anio naungku massusa wuṛṛu sussinggawanga? I ya'u uaantimma Ruata. Ne i ya'u maadiangkamanna apia si Tou, su Ruata'u wuṛṛu mananal᷊ama'u.

^7-8 Su leta'a pamamanguanna indi naungku naṛimunsa'a, ana waugu udde i ya'u nanaungnga Mawu. Niawa'u nielekku saggan asasusa, i ya'u niṛṛammon manawangu al᷊iba'ukka; naal᷊ihidda tingikku ampassu Sal᷊ukku Yordan wuassu Wowon Hermon wuṛṛu Wowon Mizar.

⁹ Antimanna Mawu mapal᷊iatta'u darangngu-Ne sutempo allo, tadea'u sutempo ṛabbi i ya'u wotongnge mangantari wuṛṛu umal᷊iomanna su Ruata punnu wia'u.

¹⁰ I ya'u nabbisara su Ruata, mananahe'u, “Anio I'o naabul᷊i'u? Anio i ya'u sidutu uatataṛṛangnga, ana waugu aallangannu manga see'u?”

¹¹ Naungku naṛṛimunsa'a ana waugu aal᷊uandagu seetta. I mangitou sidutu ma'iwal᷊o, “Suapate Ruatanu?”

¹² Anio naungku massusa wuṛṛu sussinggawanga? I ya'u uaantimma Ruata. Ne i ya'u maadiangkamanna apia si Tou, su Ruata'u wuṛṛu mananal᷊ama'u.