DARALO 41 - WUKE SUSI WATTI'U AL᷊AL᷊USASSA

Aal᷊iomanna madorongnga apapia wuassu radda'a

¹ Su piaṛṛa'u mangangantari. Daralon Daud.

² Lal᷊umanna'a su taumata apan u'akkannu taumata lome; Mawu sarun mantul᷊ungngi tou sutempon asasusa.

³ Mawu sarun mallu'adda wuṛṛu mappadul᷊i si tou, I tou sarun malluassa si tou su runia, wuṛṛu tawe manantilli tou su liman seenne.

⁴ Mawu sarun mantul᷊ungngi tou sutempo maradda'a, wuṛṛu i tou sarun mabbannasanna wuassu raddange.

⁵ Wisara'u, “I ya'u narosate su saruan-Nu, oh Mawu, akkanaawe i ya'u wuṛṛu paapiaawe i ya'u.”

⁶ See'u ma'umbilangu al᷊al᷊eo'u, i mangitou mappandumma tadea'u i ya'u mate wuṛṛu timbul᷊iananna.

⁷ Manga taumata apan mattembo si ya'u tawe naungnge mal᷊uassa. I mangitou mangngammulu watti'u al᷊al᷊eo'u, ana see iapasingkatta su al᷊awo'u tampa.

⁸ sarangkanambone apan maddantingku uasasal᷊imburunga; i mangitou mabbisara tumanite al᷊eoanne su watangangku.

⁹ I mangitou mabbisara, “Radange mawakkate atonna, i tou lai maawangunna.”

¹⁰ Ewe'e lai hawe ate apan apangimanangku, taumata apan u'anna susambau ringangku buatte nangadio'a si ya'u.

¹¹ Akkanaawe i ya'u oh Mawu, paapiaawe i ya'u wuassu radda'a, tadea'u i ya'u wotongnge mabbal᷊issa al᷊al᷊eon manga see'u.

¹² Amungkangu i ya'u tawe iawaddon see'u, i ya'u masingkate manungku I'o mal᷊uassa si ya'u.

¹³ I'o niumontolla si ya'u ana waugu awawaresin naungku, wuṛṛu namala'u mabbiakka suadio'a ringan-Nu saran mal᷊annu-l᷊annu.

¹⁴ Paddalote Mawu, Ruatan Israel! Paddalote si Tou orassa indi wuṛṛu saran mal᷊annu-l᷊annu! Ariadite aroddi. Amin!