DARALO 37 - WUKE SUSI WATTI'U AL᷊AL᷊USASSA

Pal᷊addu taumata lal᷊eo wuṛṛu taumata mapia

¹ Wuassi Daud. Arie i yamiu sussinggawanga ana waugu taumata lal᷊eo, arie sumelo'a su taumata apan na'ola'a pasasal᷊a.

² Ana waugu i mangitou mal᷊ihakke mawul᷊i naal᷊ihidda wal᷊abbuka, wuṛṛu tumolangnga ere sinuananna nangelomma.

³ Pangimante Mawu, wuṛṛu pa'ola'e apapia, pamanuate su wanua udde wuṛṛu paatul᷊idda mabbiakka.

⁴ Paddea'e lal᷊umanangu su Mawu, I Tou sarun mangutungu apulun naungngu.

⁵ Tantil᷊a'e wiakku su Mawu, pangantimpe si Tou, i Tou sarun mantul᷊ungngu.

⁶ I Tou sarun mapal᷊iatta'u tatuṛṛunnu ere asasemakka, wuṛṛu pallal᷊agunu ere allo.

⁷ Ṛaddoite Mawu ringannu naungnga matammuda, ṛaddoite ringannu asasabare ma'oman sara i Tou mammanara. Arie suminggawanga su taumata apan napantaingu wiakke, ara'e iapa manarane mammahia.

⁸ Arie masa'u wuṛṛu mal᷊oso naungnga, udde tumba'u mangngapiddu asasilaka.

⁹ Ana waugu taumata apan ma'ola'a al᷊al᷊eo, sarun ṛaddaanna, arawe isai uaantimma Mawu sarun manahuanna leta'a udde.

¹⁰ Taumata lal᷊eo sarun mawul᷊i ringannu mal᷊ihakka, amungkangu reaanna, i tou tate asombanganna.

¹¹ Taumata apan mawawo naungnge sarun mappussa'a leta'a udde, wuṛṛu maapendamma lal᷊umanna'a marasai.

¹² Taumata lal᷊eo manggol᷊agu al᷊al᷊eo su taumata mapia, wuṛṛu ma'ellega ringannu ararantinna.

¹³ Arawe Mawu lullaggen taumata lal᷊eo, ana waugu i Tou masingkatte panginsueannu taumata udde maranite.

¹⁴ Taumata lal᷊eo mannawutta hal᷊ele wuṛṛu mammiti'u anaanna ipamate taumata asiangnga wuṛṛu su awussa, ipakkata taumata apan mabbiakka matul᷊idda.

¹⁵ Arawe taumata lal᷊eo sarun a'usu'annu hal᷊elene sassane, darangeanni mangitou sarun paddianna.

¹⁶ Saranapa addio'a apan tatahuannu taumata mapia maareganna wuassu paa'alan taumata lal᷊eo.

¹⁷ Ana waugu taṛṛinon taumata lal᷊eo sarun paddiannu Mawu, arawe taumata mapia sidutu lal᷊uaran-Ne.

¹⁸ Mawu ual᷊u'adda wiakku taumata susi, darotongnga pussa'an mangitou saran mal᷊annu-l᷊annu.

¹⁹ Sutempon asasusa i mangitou tawe mataṛṛangnga, sutempon ṛutumma i mangitou sidutu nasuungnga.

²⁰ Arawe taumata lal᷊eo sarun mate, seettu Mawu sarun mawul᷊i naal᷊ihidda wunga su wadda'a, i mangitou sarun mawul᷊i sulal᷊ummu timbulla.

²¹ Taumata lal᷊eo mabballasa arawe tawe mamelengnga, arawe taumata mapia mangonggolu ringannu naungnga mal᷊uassa.

²² Taumata apan nial᷊amatannu Mawu sarun manahuanna leta'a udde, arawe taumata apan niwontohan-Ne sarun limbuaṛṛanna.

²³ Mawu mangngehetta taumata sulal᷊anna apan ṛinone amatanne, i Tou mannohassa taumata mabbiakka tuttuṛṛuta apulu-Ne.

²⁴ Napawe manawo, i tou sarun tawe mal᷊essa wahewalla, ana waugu Mawu ua'ehetta limane.

²⁵ Ro'en i ya'u ta'e dario'a naddatingu timmadete, taambe saran paassa i ya'u taambe naasilo taumata mapia tinantangu Mawu, ara'e ana'a pulunnu nabbal᷊i maddarorongnga.

²⁶ I tou sidutu mappawallasa wuṛṛu mangonggola, wuṛṛu manga anangnge nabbal᷊i al᷊amatta si tou.

²⁷ Tantanga'e taumata lal᷊eo, pa'ola'e apapia, ne saran mal᷊annu-l᷊annu papapulunnu sarun manahuanna leta'a udde.

²⁸ Ana waugu Mawu marangngu inolaanna apan mapia wuṛṛu matul᷊idda, taumata apan matuṛṛutta si Tou tawe niwala-Ne su asasusa. I Tou ual᷊u'adda si mangitou saran mal᷊annu-l᷊annu, arawe papapulunnu taumata lal᷊eo sarun ṛaddaanna.

²⁹ Taumata susi sarun manahuanna leta'a udde, wuṛṛu mamanua isudde saran mal᷊annu-l᷊annu.

³⁰ Taumata mapia mabbisara ringannu apande, i tou sidutu matul᷊idda sulal᷊ummu wisarane.

³¹ Titan Ruatane sasahipunanna sulal᷊ummu naungnge, i tou tawe sumewadda tita udde.

³² Taumata mapia lal᷊ingeannu taumata lal᷊eo apan maddea'a tempone ipamate si tou.

³³ Arawe Mawu tawe mamalan tou manawo su liman seetta, ara'e iṛuumanna sutempo parikisanna.

³⁴ Pangantimpe su Mawu wuṛṛu paatuṛṛutte parenta-Ne, ne i Tou mamatunna si'o iapatahuanna leta'a udde; i'o sarun maasilo taumata lal᷊eo ṛaddaanna.

³⁵ I ya'u naasilote taumata lal᷊eo mattal᷊imoṛṛonganna; i tou naal᷊ihidda aaluanna apan masuwukka wuṛṛu ṛamunne malal᷊umma.

³⁶ Sutempo i ya'u sinumabbi, i tou tate baddi'a lai, i tou raddeaangku, arawe tawe niasombangangku.

³⁷ Pa'ellege taumata apan mapia wuṛṛu naungnge waresi; taumata apan mapulun paddarame uatahuanna allo addantane.

³⁸ Arawe taumata marosa sarun pateanna; papapulunni mangitou sarun ṛaddaanna.

³⁹ Mawu nanal᷊amatta taumata susi, wuṛṛu nallu'adda si mangitou wuassu asasusa.

⁴⁰ I Tou niumontola wuṛṛu nanal᷊amatta si mangitou, wuṛṛu namallossi mangitou wuassu taumata lal᷊eo, ana waugu i mangitou uasirungnga si Tou.