DARALO 36 - WUKE SUSI WATTI'U AL᷊AL᷊USASSA

Al᷊al᷊eon taumata wuṛṛu apapian Duata

¹ Su piaṛṛa'u mangangantari. Wuassi Daud, allangu Mawu.

Al᷊al᷊eon taumata

² Rosa mabbisara sulal᷊ummu naungngu taumata lal᷊eo, i tou mangke tawe mata'uttu Ruata.

³ I tou uapendamma watanganne atohasanne, na'oman sara tawe maatutukka pasasal᷊ane, wuṛṛu tawe mabbinsine.

⁴ Manga wisarane lal᷊eo wuṛṛu napenen wawahia, i tou tate lai ma'ola'a apapia wuṛṛu apapande.

⁵ Su tampan tatiil᷊anna i tou manggol᷊agu al᷊al᷊eo, inolaanne taweddu mapia, iapa lal᷊eo tawe ito'ene.

Apapian Duata

⁶ Mawu, darangngu-Nu ere atanggaku langitta, wuṛṛu atatul᷊iddu Mawu naddatingu winabbawa.

⁷ Apapia-Nu naal᷊ihidda atanggaku wowone, wuṛṛu atatul᷊iddu Mawu alal᷊umme ere laudda; taumata wuṛṛu winatangnga nipadul᷊ianan-Nu, oh Mawu.

⁸ Tumaniten maarega darangngu-Nu, oh Ruata, taumata uasirungnga sulal᷊ummu al᷊ungngu papaiddu Mawu.

⁹ I mangitou nal᷊aiddu anna su Wal᷊en-Nu, ringannu ua'e wuassu sal᷊ukku Mawu apan maatohassa.

¹⁰ Ete I'o punnu pabbawiakku anambon riadianna, sulal᷊ummu semakku Mawu i yami naasilo semakka.

¹¹ Antimanna I'o sidutu umakkannu taumata apan maaillal᷊a Si'o, wuṛṛu mandangngu taumata naungnge matul᷊idda.

¹² Arie pabbala'a i ya'u pangaloannu taumata mawunga, ara'e limbuaṛṛannu taumata lal᷊eo.

¹³ Pa'ellege, taumata apan na'ola'a al᷊al᷊eo nanawote, i mangitou nawal᷊atta wuṛṛu tate maawuatta apia.