DARALO 35 - WUKE SUSI WATTI'U AL᷊AL᷊USASSA

Aal᷊iomanna maddorongnga aontolla

¹ Daralon Daud. Mawu, ro'apete taumata apan lullawangnga si ya'u, pangaloite taumata apan mammangalo si ya'u.

² Panganute lal᷊indumma wuṛṛu allung-Ngu, wuṛṛu darisikke pangontola si ya'u.

³ Wattea'e sambeangnga wuṛṛu wangkao-Nu ipando'appa taumata apan mangngenggena si ya'u. Wal᷊oa'e si ya'u manungku I'o mananal᷊ama'u.

⁴ Wala'e taumata apan maapulu mamate si ya'u iawaddo wuṛṛu pansilianna. Wala'e taumata apan ma'ire mando'apa si ya'u sumuṛṛotta ringannu nial᷊iwune.

⁵ Wala'e i mangitou enggenannu mala'ekattu Mawu, naal᷊ihidda wal᷊a'a nisal᷊iawukku anginna.

⁶ Wala'e i mangitou enggenannu mala'ekattu Mawu sulal᷊anna apan marandumma wuṛṛu mal᷊ewakka.

⁷ Tawe gunane i mangitou mantaingngu sedda si ya'u ara'e maal᷊i loṛṛangnga ipanametta si ya'u.

⁸ Wala'e i mangitou aemaannu papate ringannu awagananna. Wala'e i mangitou asametannu seddane sassane ana see manawo wuṛṛu mate.

⁹ Ne i ya'u lullala'a ana waugu Mawu, naungku mal᷊uassa ana waugu i Tou nanal᷊amatta si ya'u.

¹⁰ Ringannu ahewallu naungnga i ya'u nabbisara, “Mawu, I'o tawe sul᷊ungnge! I'o namallossu taumata lome wuassu taumata matohassa, iapa asiangnga wuṛṛu susa wuassu mananansarane.”

¹¹ Manga matatiala lal᷊eo dirumarisikka lumawangnga si ya'u, wuṛṛu nangansilla manungku i ya'u na'ola'a manga inolaanna apan awaganangku.

¹² Apapia'u niwal᷊isanni mangitou ringannu al᷊al᷊eo; i ya'u nawul᷊ussa sulal᷊ummu sasassila.

¹³ Sutempo i mangitou maradda'a, i ya'u massusa wuṛṛu tawe umanna; i ya'u u'al᷊iomanna ringannu uaruutta,

¹⁴ naal᷊ihidda u'al᷊iomannu sangkatou tuṛṛangnga ara'e sangkatou hawe ate. I ya'u uaruutta lulluain mangitou, naal᷊ihidda i ya'u lullal᷊on inangku sassane.

¹⁵ Arawe sutempo i ya'u su asasusa, i mangitou lulluassa, wuṛṛu nakkulunna mando'appa si ya'u. I mangitou u'amatta ua'ento ipallobbosa si ya'u.

¹⁶ I mangitou sidutu mangngal᷊uandaga sangkatou peṛṛo, wuṛṛu ma'ellega si ya'u ringannu maddantunna.

¹⁷ Ma'oman sara tingngera, oh Mawu, ma'oman sara tingngera I'o tumba'u ma'ellega? Sal᷊amatewe i ya'u wuassu pangalon mangitou, liuaawe i ya'u wuassu manga singa udde.

¹⁸ Ne i ya'u sarun maadiangkamanna Si'o su tangngan al᷊aṛanang-Ngu, wuṛṛu maddalo aran-Nu sulal᷊ummu paammul᷊anni mangitou.

¹⁹ Ariewe pabbala'a i ya'u nannalangannu taumata masseetta si ya'u ringannu tawe pangiananne. Ariewe pabbala'a i ya'u ipallal᷊age taumata apan maddantingku ringannu tawe pangiananne.

²⁰ Pabbawisaran mangitou maṛṛagissa; i mangitou manggol᷊agu pallal᷊inga su taumata apan mabbiakka uasasangkapia.

²¹ I mangitou mangngintul᷊i si ya'u wuṛṛu mabbisara manungku i mangitou naasilote inolaangku.

²² Arawe I'o, Mawu, naasilote; ariewe mangintammuda, oh Mawu, ariewe pangindau wuassi ya'u.

²³ Darisikke panamba'a hatto'u, oh Ruata'u wuṛṛu Mawu'u, ontol᷊ewe i ya'u!

²⁴ Sambaaiwe i ya'u, ana waugu I'o matul᷊idda, oh Mawu Ruata'u, arie pabbala'a seetta maggio'u.

²⁵ Ariewe pabbala'a i mangitou mabbisara sulal᷊ummu naungnga, “Adiangkamanna, i ite buatte nanginsue niawane. Apulun kite niawatu'ante!”

²⁶ Wala'e taumata apan naasilo asasusa'u mabbal᷊i ial᷊iwune wuṛṛu massili. Wala'e taumata apan mammungan batangane su saruangku lobbosanna wuṛṛu pansilianna.

²⁷ Antimanna taumata apan maapulu ma'ellega si ya'u iapaṛṛino lullala'a wuṛṛu lulluassa. Antimanna i mangitou masokka mabbisara, “Mangke atonna Mawu mawantuga! I Tou maapulun asasal᷊amattu allang-Nge!”

²⁸ Ne i ya'u sarun mamasingkatu atatul᷊iddu Mawu, wuṛṛu maddalo Si'o su al᷊o'engngu allo.