DARALO 33 - WUKE SUSI WATTI'U AL᷊AL᷊USASSA

Aantari daralo

¹ Ei manga taumata susi, paggioten al᷊al᷊uassa ana waugu sarangkanambone apan buatte niola'u Mawu; ṛinone taumata matul᷊idda sidutu maddalo.

² Paadiangkamante su Mawu ringannu kecapi, paddalote si Tou ringannu musikka.

³ Pangantariten aantari wakku su Mawu, pannalangke kecapi mapia-pia paggiote ringannu al᷊al᷊uassa!

⁴ Anambon wisaran Mawu sidutu apangimananna; I Tou satia su al᷊awo'u inolaan-Ne.

⁵ I Tou marangngu apapia wuṛṛu atatul᷊idda; ahewallu runia nepenen darangngu-Ne.

⁶ Mawu nanita, ne langitta nariaddite; matannallo, wul᷊anna wuṛṛu anumpitanna niola'u ṛengetan-Ne.

⁷ Anambon ua'en tahal᷊oangnga niammuli Tou su sambau tampa, laudda mal᷊alangnga nitaṛṛangan-Ne ere pinassaranna.

⁸ Wala'e ahewallu runia mata'uttu Mawu wuṛṛu tumana'u runia mangaddata si Tou.

⁹ Ana waugu i Tou nakkengetta, ana see sarangkanambone nariaddi; i Tou nanita, ana see sarangkanambone piate.

¹⁰ Mawu nanal᷊are hol᷊agu manga walahanna, i Tou napaawul᷊i apulun mangitou.

¹¹ Arawe ṛiinnu Mawu sidutu ta'e aroddi, apan niatokke uata'a su al᷊o'engngu tempo.

¹² Lal᷊umanna'a walahanna apan mangnga'u Mawu udde Ruatane, lal᷊umanna'a su taumata apan nipile-Ne maola'a pussaa-Ne!

¹³ Wuassu surga Mawu nangintanno, wuṛṛu i Tou naasilo anambon taumata.

¹⁴ Wuassu aianan-Ne Mawu ma'ellega sarangkanambone apan uatana'a su runia.

¹⁵ Ete i Tou apan nangatokku naungngi mangitou, wuṛṛu namasingkattu al᷊awo'u inolaanni mangitou.

¹⁶ Ratu tawe maauntunga ana waugu manambo tantarane, tantara tawe maasal᷊amatta ana waugu atatohanne.

¹⁷ Awal᷊o tawe iawansaga maauntunga, atatohanne apan wahewalla tawe maasal᷊amatta.

¹⁸ Mawu ual᷊u'adda manga taumata apan mangngimanna apan uaantimma darangngu-Ne.

¹⁹ I Tou nanal᷊amatta si mangitou wuassu papate, wuṛṛu nappadul᷊i si mangitou su tempo ṛutumma.

²⁰ Ne i ite uaantimpe Mawu, ete i Tou matatul᷊unga wuṛṛu mananamba'a si ite.

²¹ I ite lulluassa ana waugu i Tou wuṛṛu mangngimanna aran-Ne apan susi.

²² Antimanna i yami sidutu arangnguan-Nu, oh Mawu, ana waugu i yami mangngantimma Si'o.