DARALO 32 - WUKE SUSI WATTI'U AL᷊AL᷊USASSA

Panga'uanna wuṛṛu pangangampunga

¹ Daralon Daud. Aantari tatantiro. Lal᷊umanna'a su taumata apan rosane niampunganna, wuṛṛu pasasal᷊ane nipappassa.

² Lal᷊umanna'a su taumata apan al᷊al᷊eone tawe nireengngu Mawu, wuṛṛu maddiri mamahia.

³ Su al᷊annune i ya'u tawe manga'u rosa'u, i ya'u lome ana waugu sussal᷊iomanna su al᷊o'engngu allo.

⁴ Allo ṛabbi I'o mannasa'u, Mawu, i ya'u niasueannu ikkata niiṛṛuppu matannallo.

⁵ Ana see i ya'u nanga'ute rosa'u Si'o, pasasal᷊a'u taweddu ta'u niwuni. I ya'u nakkawessa, sarangkanambone a'uanna Si'o, ne I'o nangampunga rosa'u.

⁶ Ana waugu udde suapan taumata susi ṛinone umal᷊iomanna sutempo mamendamma asasusa, na'oman sara amungkangngu manawangngu asasusa rumanta, i tou tawe aeleṛṛanne.

⁷ Ete I'o tampa pa'imbuniangku, I'o namallo'u wuassu asasusa. Ne i ya'u lullala'u al᷊al᷊uassa, ana waugu I'o buatte nanal᷊amatta si ya'u.

⁸ Wisaran Mawu, “I ya'u sarun mamantingidu lal᷊anna apan amatannu, i'o sarun Ta'u ehetanna wuṛṛu Ta'u tantiroanna.

⁹ Arie naal᷊ihidda awal᷊o apan tawe ṛingidde, apan ṛinone iappiaṛa'u tal᷊in ngirunna wuṛṛu tal᷊i tadea'u tumuṛutta.”

¹⁰ Taumata marosa aṛṛiaannu manambo asasusa; arawe taumata apan uaantima Mawu sidutu sasirungannu darangngu-Ne.

¹¹ Ei manga taumata susi, lallala'e wuṛṛu lalluasse ana waugu apa apan buatte niola'u Mawu. Paggioten al᷊al᷊uassa, ei anambon taumata apan naungnge matul᷊idda!