DARALO 31 - WUKE SUSI WATTI'U AL᷊AL᷊USASSA

Mangngantima Ruata

¹ Su piaṛṛa'u mangangantari. Daralon Daud.

² Ete Si'o i ya'u uasirungnga oh Mawu, arie pabbala'a i ya'u sumassilla. Pasal᷊amataawe i ya'u ana waugu atatul᷊iddu Mawu

³ daringiṛṛewe i ya'u wuṛṛu pallosa'e i ya'u paal᷊ihakka. Ariaditewe si ya'u ere wowon batu tampa pattillumangku, naal᷊ihidda tanda'a watu apan matohassa, suapa i ya'u wotongnge masal᷊amatta.

⁴ Ore, I'o naal᷊ihidda wowone watu wuṛṛu tanda'a watu apan matohassa si ya'u! Ehettawe i ya'u ere buatte nipa'ire-Nu.

⁵ Pallosaawe i ya'u wuassu sedda apan nitaingnga si ya'u, ana waugu ete I'o tampa i ya'u uasirungnga.

⁶ Sulal᷊ummu lima-Nu ta'u itantilla watangangku; i ya'u nipallosu Mawu, oh Mawu, Ruata apan setia.

⁷ Taumata apan massubba paal᷊uanna ipabbinsi-Nu; arawe i ya'u mangimanna Si'o Mawu.

⁸ I ya'u sarun lumuassa wuṛṛu lumala'a ana waugu I'o sidutu mandangngu si ya'u. I ya'u naasilo asansara'u wuṛṛu ma'ellega asasusa'u.

⁹ I'o tawe namala'u niasamettu seetta, arawe namala'u niumamatta ringannu mapia.

¹⁰ Akkanaawe i ya'u, oh Mawu, ana waugu i ya'u sulal᷊ummu asasusa; mata'u mapal᷊atta ana waugu lulluai, wadangnga wuṛṛu niawa'u maggingge.

¹¹ I ya'u mabbiakka nappussa sulal᷊ummu asasusa, manga tonna'u malliudda sulal᷊ummu sasal᷊iomanna. Auatangku nahaingnga ana waugu al᷊al᷊eo'u, ewe'e lai manga duṛṛi'u nabbal᷊i maṛṛattu.

¹² I ya'u naola'a papal᷊age su anambon see'u, ewe'e lai su manga al᷊indongangku. Anambon hawe'u niṛṛumindu'a napawe naasilo si ya'u, i mangitou tumal᷊angnga napawe massomba'u su lal᷊anna.

¹³ I ya'u tinimbul᷊iananna naal᷊ihidda taumata nate, wuṛṛu nabbal᷊i ere saranapa nirammete.

¹⁴ Su al᷊awo'u tampa pia atata'utta; i ya'u maaringikka sasal᷊imburungu see'u. I mangitou nabbaidda mando'appa si ya'u wuṛṛu maṛṛiinna tadea'u mamate si ya'u.

¹⁵ Arawe i ya'u uaantimma Si'o, oh Mawu, ana waugu ete I'o Ruata'u.

¹⁶ I'o sidutu mammadul᷊i si ya'u; sal᷊amatewe i ya'u wuassu manga see'u wuṛṛu wuassu manga taumata apan mangngenggena si ya'u.

¹⁷ Antimanna I'o mandangngu allang-Ngu; sal᷊amatewe i ya'u ana waugu darangngu-Nu.

¹⁸ Arie pabbala'a i ya'u maasomba asasili, oh Mawu, ana waugu i ya'u ma'ial᷊are Si'o. Wala'ewe taumata lal᷊eo pansilianna, wuṛṛu ringannu matammudda summossokka watukku runian taumata nate.

¹⁹ Sappingete moṛṛongngu taṛṛa wahia apan ringannu mawunga mallobbossa taumata matul᷊idda.

²⁰ Aroddi anambone apapia-Nu apan nisaddia-Nu su taumata apan mangngimanna! Suapan taumata naasilo apapia apan niolang-Ngu, si mangitou apan uatillumma Si'o.

²¹ I'o namunin mangitou sulal᷊ummu tatillumma-Nu su saruannu hol᷊agu taumata lal᷊eo; I'o nallu'adda si mangitou sulal᷊ummu papaiddu Mawu su saruannu aansillu ro'appa.

²² Daralo su Mawu! Tumaniten maatiangnga darangngu-Ne si ya'u, sutempo i ya'u nitalliwunanna wuṛṛu nipangaloanna.

²³ Sulal᷊ummu i ya'u niumal᷊ingu i ya'u massunna Mawu buatte nandamme'u wuassu araratuan-Ne. Arawe i Tou buatte naddaringikka sasal᷊ande'u sutempo i ya'u sinumal᷊ande si Tou.

²⁴ Pandangngute Mawu, ei anambon al᷊aṛṛanang-Nge, Mawu mallu'adda taumata apan matuṛṛutta. Arawe taumata mawunga niṛṛuuman-Ne ringannu tawe umakkanna.

²⁵ Paatohassa wuṛṛu pa'uatta naungngu, i yamiu sarangkanambone apan uaantimma su Mawu.