DARALO 29 - WUKE SUSI WATTI'U AL᷊AL᷊USASSA

Tingikku Mawu sulal᷊ummu anginna ma'ikkata

¹ Daralon Daud. Paddalote Mawu, ei manga riadiannu surgawi, paddalote awawantuga wuṛṛu taṛṛino-Ne.

² Paddalote arannu Mawu apan mawantuga passubbate si Tou ringannu mappaatu peddetu patataṛamawu.

³ Ruata apan mawantuga nirumallu'a su wowon tahal᷊oanga, tingik-Ke pia sanseonge su wowon laudda.

⁴ Tingikku Mawu niaringiṛṛanna, napenen taṛṛino wuṛṛu araṛṛamaga.

⁵ Tingikku Mawu nanuwangnga aaluanna, maapaddi punnu cemaran Libanon.

⁶ Wowon Libanon niolang-Nge sussolo'a naal᷊ihidda ana'u sapi, Wowon Siryon sussolo'a ere ana'u bantenga.

⁷ Tingikku Mawu naaola'a sawallo ma'ilatta.

⁸ Tingikku Mawu nangio'u wadda'a, Mawu nangio'u wadda'u Kades.

⁹ Tingikku Mawu nangio'u manga punnu alu wahewalla, wuṛṛu nanontongu manga rongnga su mahurangnge; tantal᷊anna su Wal᷊en Mawu umatta mangngintul᷊i, “Paddalote Mawu!”

¹⁰ Mawu uataṛṛino su manawangnga wahewalla, I Tou uaparenta naola'a Ratu saran mal᷊annu-l᷊annu.

¹¹ Antimanna Mawu mangonggolu atatohassa su walahan-Ne, wuṛṛu ma'ola'a si mangitou su lal᷊umanna'a.