DARALO 28 - WUKE SUSI WATTI'U AL᷊AL᷊USASSA

Aal᷊iomanna maddorongnga aontolla

¹ Daralon Daud. Oh Mawu, tumba'u Si'o i ya'u sumal᷊ande, I'o mananahe'u, daringiṛṛewe darorongku. Amungkangu I'o mal᷊annabba, su saruangku, i ya'u naal᷊ihidda taumata apan sinumossoka su labbinga.

² Daringiṛṛewe sasal᷊ande'u napawe i ya'u maiontola, wuṛṛu mamatunna lima'u watukku Wal᷊en-Nu apan susi.

³ Arie pamate si ya'u suadio'a ringannu taumata mal᷊awangnga, suadio'a ringannu taumata apan ma'ola'a al᷊al᷊eo. I mangitou uahahatto ringannu masaṛṛionto'a, arawe naungngi mangitou napenen awawukku'a.

⁴ Ṛuumana'e i mangitou ana waugu inolaanni mangitou, ana waugu al᷊al᷊eo apan niola'i mangitou. Ṛuumana'e i mangitou uasul᷊ungu pallal᷊aghun mangitou; i mangitou onggol᷊eten ṛuumanna uasul᷊ungngu rosane.

⁵ I mangitou tawe mangareggan inolaannu Mawu, ara'e apa apan nimanara-Ne. Ne i Tou sarun makkuumanni mangitou, wuṛṛu mamate si mangitou saran mal᷊annu-l᷊annu.

⁶ Dalo su Mawu, ana waugu i Tou buatte naddaringikka darorongku.

⁷ Mawu pattillumanna wuṛṛu mananahe'u, i ya'u mangngimanna si Tou. I Tou nantul᷊ungnga wuṛṛu nalluassa naungku, i ya'u maddalo si Tou ringannu aantarin aadiangkamanna.

⁸ Mawu nangonggolu atatohassa su al᷊aṛanang-Nge, I Tou nanamba'a wuṛṛu nanal᷊amatta ratu nipile-Ne.

⁹ Sal᷊amatewe al᷊aṛṛanang-Ngu, oh Mawu, al᷊amatewe manga taumata pussaa-Nu. Pattingkaola'e ere sangkatou mallal᷊u'adda si mangitou, wuṛṛu riagaite i mangitou saran mal᷊annu-l᷊annu.