DARALO 26 - WUKE SUSI WATTI'U AL᷊AL᷊USASSA

Aal᷊iomannu taumata apan tawe sal᷊ane

¹ Daralon Daud. Onggol᷊eten atatul᷊idda si ya'u, oh Mawu, ana waugu i ya'u mabbiakka ringannu naungnga matul᷊idda. I ya'u uaantimma Mawu, wuṛṛu tawe mapapadua sarangkadio'a.

² Saṛṛasirewe i ya'u, oh Mawu, wuṛṛu sal᷊u'ate'o i ya'u, parikisewe apulu'u wuṛṛu ṛingirangku.

³ I ya'u sidutu uanaungnga darangngu-Nu, wuṛṛu sidutu matuṛṛutta Si'o.

⁴ I ya'u maddiri maammullu taṛṛa l᷊inga, ara'e maggawen taumata lilangkamal᷊e'a.

⁵ I ya'u maddantinnu ammul᷊annu taumata apan ma'ola'a al᷊al᷊eo, ṛuangannu taumata lal᷊eo ta'u ilallinda'a.

⁶ Lima'u niukkasa tatialan tawe nassal᷊a, wuṛṛu u'amatta mammal᷊iwutta mezba-Nu, oh Mawu,

⁷ lapiddu mangngantari antarin aadiangkamanna, wuṛṛu mammasingkattu inolaan-Nu apan maatiangnga.

⁸ I ya'u mandangngu Wal᷊en-Nu, oh Mawu, sutampa I'o uatana'a ringannu awawantuga.

⁹ I ya'u arie pappate suadio'a ringannu taumata marosa, ara'e manawutta niawa'u suadio'a ringannu taṛṛa pate.

¹⁰ I mangitou sidutu ma'ola'a al᷊al᷊eo, wuṛṛu sidutu uasadiate manengkamma roitta sasal᷊o'a.

¹¹ Arawe i ya'u mabbiakka ringannu naungnga matul᷊idda, akkanaawe wuṛṛu liuaawe i ya'u.

¹² Ne i ya'u nal᷊iute wuassu al᷊awo'u asasilaka, i ya'u sarun maddalo Mawu sulal᷊ummu ammul᷊annu al᷊aṛṛanang-Nge.