DARALO 25 - WUKE SUSI WATTI'U AL᷊AL᷊USASSA

Aal᷊iomanna madorongnga tatantiro wuṛṛu pattillumanna

¹ Daralon Daud. Tumba'u Si'o, oh Mawu, i ya'u umal᷊iomanna,

² oh Ruata'u, i ya'u mangimanna Si'o! Arie pabbala'a i ya'u pappansilianna, wuṛṛu tattampissi'u manga see'u.

³ Taumata apan nandal᷊eo Si'o sarun pansilianna, arawe apan mangngimanna Si'o sarun tawe sumassila.

⁴ Pantingira'e apulu-Nu si ya'u, oh Mawu, pasingkata'e apa apan ṛinone ta'u olaanna.

⁵ Aṛṛa'e wuṛṛu tantiroiwe i ya'u su ipabbiakka tuttuṛuṛutta apulu-Nu, ana waugu ete I'o Ruata apan nanal᷊amatta si ya'u, i ya'u sidutu uaantimma Si'o.

⁶ Naungewe apapia wuṛṛu darangngu-Nu, oh Mawu, apan buatte nitantiro-Nu ro'en paarorone.

⁷ Ampungewe rosa wuṛṛu pasasal᷊a'u sutempo i ya'u ta'e dario'a, naungewe ringannu darangngu wuṛṛu apapia-Nu.

⁸ Ana waugu Mawu mapia wuṛṛu matul᷊idda, I'o namantingiddu lal᷊anna su taumata apan nial᷊iwune.

⁹ Mawu nangehetta taumata apan naungnge mawawo, wuṛṛu nangaṛṛa'u apulu-Ne si mangitou.

¹⁰ Taumata apan matuṛṛutta paaire-Ne wuṛṛu tita-Ne, papadul᷊ianan-Ne ringannu darangngu wuṛṛu tatuṛṛutta.

¹¹ Mawu, ampungewe i ya'u ere buatte nipa'ire-Nu, ana waugu pasasal᷊a'u tumaniten wahewalla.

¹² Taumata mangngaṛṛa'a taumata mangngimanna lal᷊anna apan ṛinone amatanni mangitou.

¹³ I mangitou sidutu mabbiakka su lal᷊umanna'a, ana'a papapulunni mangitou sarun manahuanna leta'a pussa'a.

¹⁴ Mawu uddewe hawen taumata apan mangngimanna, I Tou namasingkattu panduman-Ne si mangitou.

¹⁵ Mata'u sidutu ua'ellega Mawu, ana waugu i Tou nanal᷊amatta si ya'u wuassu asasilaka.

¹⁶ Ellehewe i ya'u wuṛṛu akkanaawe i ya'u, ana waugu i ya'u mal᷊annaba wuṛṛu su asasusa.

¹⁷ Asasusan naungku mangke aatambanna liuaawe i ya'u wuassu asasausa'u.

¹⁸ Ellehewe sansara wuṛṛu asasusa'u, wuṛṛu ampungewe anambon rosa'u.

¹⁹ Pa'ellege aroddi anambone see'u; i mangitou tumaniten mabbinsi'u.

²⁰ Riagaiwe wuṛṛu sal᷊amatewe i ya'u, tadea'u i ya'u tawe maasomba asasili, ana waugu i ya'u uatillumma Si'o.

²¹ Antimanna apapia wuṛṛu atatul᷊idda maṛṛundinganna si ya'u, ana waugu i ya'u uaantimma Si'o.

²² Oh Ruata, pallosaawe al᷊aṛṛanang-Ngu wuassu al᷊awo'u asasusane.