DARALO 24 - WUKE SUSI WATTI'U AL᷊AL᷊USASSA

Ratu mawantuga

¹ Daralon Daud. Ete Mawu uatahuanna runia wuṛṛu lal᷊oṛṛone, runia wuṛṛu sarangkamabone apan uatana'a.

² I Tou nangaddon rapappake su wowon tahal᷊oangnga, wuṛṛu nipasi'a su ua'e apan mal᷊al᷊umma.

³ Isai wotongnge suma'a su Wuiddu Mawu, wuṛṛu sumutta sulal᷊ummu Wal᷊en-Ne?

⁴ Taumata apan ṛingiranne wuṛṛu inolaanne tawe sangkule, apan tawe massalu awusu wuṛṛu tawe massubba paal᷊uanna.

⁵ Ete i tou apan nial᷊amatanna wuṛṛu niapasal᷊amattu Mawu, wuṛṛu niapal᷊iatta'u Ruata manungku i tou tawe sal᷊ane.

⁶ Etearoddi taumata apan rumanta sumaruanna Ruata, apan rumanta massubba Ruatan Yakub.

⁷ Wu'ate paal᷊oangnga ngara wahewalla tabbe udde, tadea'u sumutta Ratu apan mawantuga.

⁸ Isai Ratu apan mawantuga? ete i Tou Mawu apan matohassa; Mawu napenen taṛṛino, apan nauntungnga sulal᷊ummu pangalo.

⁹ Wu'ate paal᷊oangnga ngara wahewa tabbe udde, tadea'u sumutta Ratu apan mawantuga.

¹⁰ Isai Ratu apan mawantuga? Mawu Apan Lembontaṛṛino, Ete i Tou Ratu apan mawantuga!