DARALO 22 - WUKE SUSI WATTI'U AL᷊AL᷊USASSA

Aal᷊iomanna sutempon asasusa

¹ Su piaṛṛa'u mangangantari. Tumuṛṛuttu antari: Rusa sutempo marua allo. Daralon Daud.

² Ruata'u, oh Ruata'u, anio I'o nanantangku? I ya'u sussal᷊ande, arawe I'o sidutu marau wuṛṛu tawe mangontola si ya'u.

³ Oh Ruata'u, i ya'u sussal᷊ande Si'o sutempo allo, arawe I'o sidutu mal᷊annaba. I ya'u u'al᷊iomanna sutempo ṛabbi, naungku tawe lai matammuda.

⁴ Arawe I'o Ratu Apan Lembonsusi, apan sidutu raddaloannu Israel.

⁵ Iupungngu al᷊amonan kami uaantimma Si'o, i mangitou uaantimma, wuṛṛu I'o nanal᷊amatta si mangitou.

⁶ I mangitou sussal᷊ande Si'o wuṛṛu niapaal᷊iu; i mangitou mangngantimma wuṛṛu tawe niapadio'a naungnge.

⁷ Arawe i ya'u indi lal᷊uati, wal᷊ine taumata, aal᷊uandahanna wuṛṛu lallobosannu awadaalla.

⁸ Sarangkanambone apan ma'ellega si ya'u, mangngeetta si ya'u, mangal᷊umbeonga wuṛṛu mappapa'ilinga.

⁹ Unni mangitou, “Wala'e aroa i tou mangngasakku Mawu, tadea'u Mawu manal᷊amatta si tou, amungkangu Mawu mal᷊uassa si tou!”

¹⁰ Ete I'o apan napasabbangku wuassu illoṛṛo, wuṛṛu na'ola'a si ya'u mal᷊angnganna su ṛiwan inangku.

¹¹ Ro'en nisungkangnga, wia'u sulal᷊ummu lima-Nu, ro'en sulal᷊ummu illoṛṛon, tumba'u I'o Ruata'u.

¹² Ariewe pangindau, ana waugu asasilaka maranite, wuṛṛu taweddu mantul᷊ungnga.

¹³ Naal᷊ihidda ammul᷊annu bantenga, seetta uaṛṛimpulunna si ya'u, naal᷊ihidda bantenga matengnga wuassu Basan i mangitou namangalo si ya'u.

¹⁴ I mangitou sinumaruanna si ya'u ringannu moṛṛongnga uanganga, naal᷊ihidda singa mammasingnga wuṛṛu tumambote.

¹⁵ Ikka'u nasuete naal᷊ihidda ua'e nabboso, anambon duṛṛi'u napallossa wuassu pabbuuanne, naungku nonossa ere lilinna.

¹⁶ Tonggol᷊angku namara ere pilessa, lila'u naddeetta su saṛṛangaddu moṛṛongku. Mawu, I'o nanantangku su wowon awu naal᷊ihidda taumata natete.

¹⁷ I ya'u nipangaloannu ammul᷊annu taumata lal᷊eo; naal᷊ihidda ammul᷊annu asu i mangitou nakkulunna si ya'u, nangusu'a lima wuṛṛu ledda'u.

¹⁸ Anambon duṛṛi'u wotongnge iareengnga, seetta ma'elega si ya'u naola'a babbialanna.

¹⁹ I mangitou nattahia lau'u, wuṛṛu nangundin juba'u.

²⁰ Arawe I'o, ariewe pangindau, oh Mawu, paal᷊ihakke rumanta pangontolla si ya'u, ana waugu ete I'o atatoha'u.

²¹ Liuaawe niawa'u wuassu hal᷊ele, sal᷊amatewe i ya'u wuassu aṛṛauttu asu.

²² I ya'u nallomete, pallosaawe i ya'u wuassu tatandu'u bantenga wuṛṛu wuassu moṛṛongu singa.

²³ Inolaan-Nu sarun ta'u iwatti'a su manga tuṛṛangku; sulal᷊ummu pangalon al᷊aṛṛang-Ngu i ya'u sidutu maddalo Si'o.

²⁴ Paddalote si Tou, ei manga taumata apan mangngimanna! Wantuhete i Tou, ei anambon papapulunni Yakub! Al᷊intuddate su saruan-Ne, anambon papapulunnu Israel!

²⁵ Ana waugu i Tou tawe ma'ellega dal᷊eo su taumata lal᷊ebone, wuṛṛu tawe mangaddio'a asasusane. I Tou tawe mabbiṛṛu wuassu taumata udde, arawe maddaringikka amungkangu i tou maiontola si Tou.

²⁶ Supattangannu ammul᷊annu taumata i ya'u maddalo Si'o, ana waugu sarangkanambone apan buatte niolang-Ngu. Su saruannu taumata apan mangngimanna i ya'u nangonggolu sasamba apan ta'u pina'ire.

²⁷ Taumata asiangnga sarun umanna ma'oman sara mal᷊aidda; taumata apan rumanta ringannu Mawu sarun maddalo si Tou. Antimanna i yamiu su lal᷊umanna'a saran mal᷊annu-l᷊annu!

²⁸ Anambon walahanna sarun mannaunga Si'o Mawu wuṛṛu mabelenga ringan-Nu, al᷊awo'u ṛuangannu walahanna sarun umal᷊intudda massubba si Tou.

²⁹ Ana waugu ete Mawu apan uataṛṛino, i Tou uaparenta manga walahanna.

³⁰ Anambon taumata papunna sarun massubba su saruan-Ne, anambon taumata apan mattate sarun umal᷊intudda massubba si Tou.

³¹ Papapulunna manansunna sarun mattaṛṛamawu Mawu, i Tou sarun iwatti'a su pallal᷊awanna see lai papapulunna.

³² Su walahanna apan niasungkangnga wua'udde sarun iapasingkatta manungku Mawu buatte nanal᷊amatta al᷊aṛṛanang-Nge.