DARALO 20 - WUKE SUSI WATTI'U AL᷊AL᷊USASSA

Aal᷊iomanna madorongnga auntunganna

¹ Su piaṛṛa'u mangangantari. Daralon Daud.

² Antimanna Mawu sumimbakka si'o, sutempon asasusa, antimanna taṛṛinon Duatan Yakub ual᷊u'adda si'o!

³ Antimanna i Tou nangonggollu sasumbala wuassu Wal᷊en-Ne, wuṛṛu mangonggolu aontola wuassu Wuiddu Sion.

⁴ Antimanna i Tou maanaungnga anambon sasambanu, wuṛṛu mal᷊uassa ringannu al᷊awo'u sasambanu itattambuna.

⁵ Antimanna i Tou mangonggolu al᷊awo'a apan pappandumannu, wuṛṛu ma'ola'a anambon hol᷊agu pia gessine.

⁶ Ne i yami maggio lulluassa ana waugu auntungannu, wuṛṛu nanduittu manga waneṛṛa ipaddalo Ruatan kite. Antimanna Mawu manengkamma al᷊awo'u darorongngu.

⁷ Orassa indi i ya'u masingkatte manungku Mawu nangonggolu auntunganna su ratu apan nipile-Ne. Mawu sinumimbakka si tou wuassu surga-Ne apan susi; ringannu taṛṛinon Mawu i tou naasomba auntunganna wahewalla.

⁸ Pia taumata mangngasakku keretan pangalone, piaddu lai mangngasakku kudane. Arawe i ite mangngasakku taṛṛinon Mawu, Ruatan kite.

⁹ I mangitou sarun itara wuṛṛu mal᷊iundu'a, arawe i ite sarun mabuatta wuṛṛu rumarisikka matohassa.

¹⁰ Oh Mawu, onggol᷊ewen auntunganna su ratu, simbaṛṛewe i yami sutempo i yami sumal᷊ande.