DARALO 2 - WUKE SUSI WATTI'U AL᷊AL᷊USASSA

Ratu pinapilen Duata

¹ Anio manga walahanna ma'ola'a pattatiakka wuṛṛu manga ṛuanganna manggol᷊agu apan tawe gunane?

² Manga Ratun dunia sangkawuatta wuṛṛu manga tembonanne ma'ire lumawanga Mawu wuṛṛu ratu apan nipile-Ne.

³ Manga tembonanne udde mabbisara, “Wette i ite mamaddi taṛṛinon mangitou wuṛṛu i ite malliu wuassu taṛṛino udde!”

⁴ Wuassu adderan araratuan-Ne su surga Mawu lullage wuṛṛu mangngadio'a hol᷊agi mangitou.

⁵ Ana see Mawu namakkamma si mangitou ringannu maṛṛagissa wuṛṛu nipaṛṛoroannu asasa'u-Ne.

⁶ Wisara-Ne, “Su Sion wui-U apan susi buatte Ta'u nitenega ratu nipile-U.”

⁷ Unnu ratu, “I ya'u maapulu mamasingkattu apa apan buatte nitantunu Mawu. wisara-Ne si ya'u, ‘I'o ana-U esakka, allo indi i Ya'u maola'a Iamangu.

⁸ Padorongke, ne anambon walahanna Ta'u ionggola Si'o, wuṛṛu ahewallu runia Ta'u olaanna pussaanu.

⁹ I mangitou sarun ta'u paddianna ringannu ta'inna atta'a wuṛṛu Ta'u pesanganna ere urinna leta'a.’ ”

¹⁰ Nariaddi panutukke, ei mararatu, paanaungete, ei manga tembonannu runia!

¹¹ Pattaṛṛamawute Mawu ringannu maadunna,

¹² al᷊intuddate susaruan-Ne ringannu mangngindo, arie ma'oman sara Mawu mabbal᷊i masa'u wuṛṛu i yamiu pateanna ringannu mal᷊ihakka, ana waugu asasa'u-Ne ṛumenggamma ringannu sangkaṛṛondappa. Lal᷊umanna'a su taumata apan uatullindumma su Mawu!