DARALO 19 - WUKE SUSI WATTI'U AL᷊AL᷊USASSA

Awawantugu Mawu sulal᷊ummu riadianna wuṛṛu sulal᷊ummu tita-Ne

¹ Su piaṛṛa'u mangangantari. Daralon Daud

Awawantugu Mawu sulal᷊ummu riadian-Ne

² Langitta mappal᷊iatta'u awawantugu Ruata, wuṛṛu winalanganna mabbatti'u manara-Ne.

³ Allo sambau mammasingkatta su allo apan manansunna; ṛabbi apan sambau mabbatti'a su ṛabbi addantane.

⁴ Taweddu mabbisara ara'e maggahatto, tawe tingikka apan aringiṛṛanna.

⁵ Arawe tingik-Ke aringiṛṛanna su ahewallu runia, tanata udde naddatingngu pentakku runia. Mawu na'ola'a wal᷊en su langitta hunan matannallo,

⁶ marua allo i tou sumabbanga naal᷊ihidda maawinga esakka sinumabbanga wuassu wabbo'ane, naal᷊ihidda atumannaṛṛannu pangalo apan lulluassa manattaku amatanne.

⁷ I Tou mammal᷊intaddu langitta wuassu pentakke saran pondole; taweddu naatal᷊angnga wuassu sal᷊ihamme.

Titan Mawu

⁸ Titan Mawu udde nasuungnga, maal᷊uassa ṛimuudda. Parentan Mawu udde wotongnge apangimananna, mangonggollu apande su taumata lal᷊ebone.

⁹ Atorannu Mawu udde naṛṛino, maal᷊uassa naungnga. Laṛṛewessu Mawu udde tutune, ma'ola'a taumata maasunna.

¹⁰ Mattaṛṛamawu su Mawu udde mapia, uatialu saran mal᷊annu-l᷊annu. Titan Mawu udde atonna wuṛṛu sarangkanambone matul᷊idda.

¹¹ Titan Mawu udde maareganne wuassu wul᷊awanna tutune, mattemanganna wuassu pul᷊a apianne.

¹² Allang-Ngu niapanaungngu sarangkanambone udde; lal᷊antakke apan wahewalla su taumata apan matuṛṛutta.

¹³ Taweddu maatutukka manungku watanganne nial᷊iwunete; Mawu, pallosaawe i ya'u wuassu pasasal᷊a apan awagananna.

¹⁴ Paarauaawe i ya'u wuassu rosa apan nipattatudda, ariewe pabbala'a i ya'u tataṛinoanne. Ne i ya'u naola'e tawe sangkulle, wuṛṛu nal᷊iute wuassu pasasal᷊a mawakkata.

¹⁵ Antimanna manga wisara wuṛṛu ṛingirangku matataṛino Si'o, oh Mawu, mallal᷊indumma wuṛṛu mananubbusa si ya'u!