DARALO 17 - WUKE SUSI WATTI'U AL᷊AL᷊USASSA

Aal᷊iomannu taumata apan tawe sal᷊ane

¹ Aal᷊iomannu Daud. Daringiṛṛewe sasal᷊ande'u maddoronga atatul᷊idda, daringiṛṛewe aal᷊iomanku apan atonna, oh Mawu.

² Antimanna manamba'a hatto'u ana waugu I'o masingkattu apa apan ṛinone.

³ Amungkangu I'o manal᷊u'atta naungku wuṛṛu rumanta manaṛṛassida si ya'u sutempo ṛabbi, I'o sarun maasingkatta manungku naungku matul᷊idda; wisara'u nassul᷊ungngu ṛingirangku.

⁴ I ya'u mammanara sarangkanambone apan itattita-Nu wuṛṛu tawe umamattu lal᷊annu araṛṛagissa.

⁵ I ya'u sidutu mabiakka tumuṛṛuttu tatantiro-Nu wuṛṛu tawe sumewadda wuassu lal᷊an-Nu.

⁶ I ya'u sussal᷊ande Si'o, oh Ruata, ana waugu I'o sinumimbakka si ya'u; intanoiwe i ya'u wuṛṛu daringiṛṛewe manga wisara'u.

⁷ Pal᷊iatta'awe darangngu-Nu apan maatiangnga ana waugu I'o nanal᷊amatta taumata apan uasirungnga Si'o, su sandiṛṛan-Nu i mangitou mal᷊angnganna wuassu pangalon seetta.

⁸ Paddul᷊ianewe i ya'u naal᷊ihidda ana'u mata-Nu, wuniaawe i ya'u su al᷊ungngu papaiddu Mawu

⁹ su saruannu pangalon taumata lal᷊eo. I ya'u papal᷊iwutannu seetta apan maapulu mamate si ya'u;

¹⁰ i mangitou wagga umakkanna wuṛṛu mabbisara ringannu mawunga.

¹¹ I mangitou niumamatta mando'appa si ya'u wuṛṛu nakkimpilunna si ya'u, madea'a loakke mamantingku.

¹² I mangitou naal᷊ihidda singa apan tumambote sinangngone, singa saṛṛen tumuwo apan mangngampanga sutampa apan uawuni.

¹³ Pabbuatte, oh Mawu, ro'apete see'u wuṛṛu waddo'e i mangitou. Sal᷊amatewe i ya'u ringannu hal᷊ele-Nu su saruannu pangalon taumata lal᷊eo.

¹⁴ Liuaawe i ya'u wuassu manga taumata apan mangngundu'u darotongngu runia. Ṛuumana'ewe i mangitou ringannu asasilaka apan buatte nissadia-Nu si mangitou. Wala'ewe ana'a papapulunni mangitou iṛṛuumanna lai.

¹⁵ Arawe i ya'u sarun ma'ellega Si'o, ana waugu i ya'u tawe sal᷊ane. Sutempo i ya'u napu'o, daranta-Nu naal᷊uassa naungku.