DARALO 149 - WUKE SUSI WATTI'U AL᷊AL᷊USASSA

Aantari daralo

¹ Paddalote Mawu! Pangantariten aantari wakku su Mawu, paddalote si Tou sulal᷊ummu ammul᷊annu al᷊aṛṛanang-Nge!

² Lallala'e, ei Israel ana waugu Mandariaddinu; lalluasse, ei tumana'u Sion ana waugu Ratunu!

³ Paddalote aran-Ne ringannu sal᷊aingnga, paddalote si Tou ringannu kecapi wuṛṛu rebana!

⁴ Mawu maapulun al᷊aṛṛanang-Nge; i Tou nangonggolu auntunganna su taumata apan naungnge mawawo.

⁵ Wala'e al᷊aṛṛana'u Ruata lumala'a ana waugu awawantu-Ge, wuṛṛu mangngantari lulluassa su al᷊o'engngu ṛabbi.

⁶ Wala'e i mangitou maddalo Ruata ringannu tingikka matelenga, lapiddu uaagassa hal᷊ele buatte niddampassa

⁷ ipabbal᷊issa manga walahanne, apan nakkuumannu manga wawosoanna;

⁸ ipamantungu manga ratu, wuṛṛu ipakkapussa manga tembonanni mangitou;

⁹ ipakkuumannu manga walahanna wuassu parentan Duata. Eteudde auntungannu umatta apan arangnguan-Ne. Paddalote Mawu!