DARALO 148 - WUKE SUSI WATTI'U AL᷊AL᷊USASSALangitta wuṛṛu runia, paddalote Mawu ! 1 Paddalote Mawu! Paddalote Mawu, ei lal᷊oṛṛon surga! Sarangkanambone apan uatana'a sutampa atanggaṛṛane, paddalote si Tou! 2 Paddalote si Tou, ei anambon mala'ekan-Ne, paddalote si Tou, ei anambon tantaran surga! 3 Paddalote si Tou, ei matannalo wuṛṛu wul᷊anna, paddalote si Tou, ei manga anumpitanna apan lullansianga! 4 Paddalote si Tou, ei langitta apan atanggaṛṛanne, paddalote si Tou, ei ua'e su wowon langitta! 5 Mappianne i mangitou sarangkamabone maddalo arannu Mawu, ana waugu sarangkanambone niola'a wuassu parenta-Ne. 6 I Tou nanantunna tampane sambau-sambau, parenta-Ne ipappaatta saran mal᷊annu-l᷊annu. 7 Paddalote Mawu, ei lal᷊oṛṛon dunia, ei manga nagan tahal᷊oangnga wuṛṛu ahewallu laudda mal᷊alangnga; 8 ei sawallo wuṛṛu uranna eisse, salju wuṛṛu winabbawa, anginna ma'ikkatta apan tuttuṛṛutta parentan Mawu! 9 Paddalote si Tou, ei manga wuidda wuṛṛu manga wowone, punnu aluanna mabbua wuṛṛu anambon mahurangnge; 10 anambon winatanga papadul᷊iananna wuṛṛu winatanga matengnga, anambon winatanga tuttundon tianne wuṛṛu manga manu'u winalanganna! 11 Paddalote si Tou, ei manga ratu wuṛṛu al᷊awo'u walahanna, manga papunna wuṛṛu anambon tembonanne; 12 anambon umbasanna wuṛṛu maṛṛuala, timmadde ara'e dario'a. 13 Mappianne i mangitou sarangkanambone maddalo Mawu, ana waugu aran-Ne mabbantuhanna wuassu al᷊awo'u aranna; awawantu-Ge uasampal᷊iu langitta wuṛṛu runia. 14 I Tou buatte nanohassa walahan-Ne, na'oman sara i Tou raddaloannu al᷊aṛṛanang-Nge, Israel umatta arangnguan-Ne. Paddalote Mawu! |
@ LAI 2003
Indonesian Bible Society