DARALO 144 - WUKE SUSI WATTI'U AL᷊AL᷊USASSA

Ratu maadiangkamanna su Mawu wuassu auntunganne

¹ Wuassi Daud. Paddalote Mawu, patatillumangku! I Tou nanantiro si ya'u masaseetta, wuṛṛu nangaṛṛa'a si ya'u mapapangalo.

² Ete i Tou matatul᷊ungku wuṛṛu mangangambangku, mananal᷊ama'u tampa i ya'u uasirungnga. I Tou mallal᷊ua'u, tampa tatal᷊angangku, manga walahanna niapasuṛubawa-Ne si ya'u.

³ Mawu, apate taumata na'oman sara I'o na'ellega si tou? Isaite i tou na'oman sara I'o mappadul᷊i si tou?

⁴ Tauamata udde naal᷊ihidda anginna paassa sumingangu, naal᷊ihidda lintau sumabbi, etearoddi ola'u wiakke.

⁵ Oh Mawu, wu'ate langitta wuṛṛu lintukke, pamitate manga wowone tadea'u tumimbulla.

⁶ Tuntunga'e sawallo-Nu tadea'u seetta massal᷊iawukka, pallosa'e anaannu tadea'u i mangitou mata'utta.

⁷ Ul᷊uṛa'e lima-Nu wuassu surga, wuṛṛu liuaawe i ya'u wuassu manawangnga. Sal᷊amatewe i ya'u wuassu taṛṛinon taumata raho

⁸ apan apulune mammahia wuṛṛu mallinga, wuṛṛu massalu awusu.

⁹ I ya'u sarun mangantarin antari wakku Si'o, oh Ruata, wuṛṛu manengkella kecapi lapiddu mangngantari.

¹⁰ I'o nangonggolu auntunganna su manga ratu, wuṛṛu namallossi Daud allang-Ngu.

¹¹ Liua'awe i ya'u wuassu hal᷊elen taumata maṛṛagissa; sal᷊amatewe i ya'u wuassu taṛṛinon taumata raho apan apulune mammahia wuṛṛu mallinga, wuṛṛu massalu awusu.

¹² Doronganna manga ana'i ite esakka sutempo umbasanna naal᷊ihidda sasuanna apan tuttuwo wahewalla. Doronganna manga ana'i ite wawine naal᷊ihidda diṛṛi maṛṛamaga, apan mallogakka manga pabbuuannu wal᷊en araratuanna.

¹³ Doronganna manga pangangadoannu amme si ite mapenen lal᷊oṛṛone ringannu al᷊awo'u hatin hessin sinuananna. Doronganna manga domban kite su wadda'a ṛumana'a ma'oman sara mapul᷊o su ṛiwune anambone.

¹⁴ Doronganna manga sapi kite ṛumana'a manambo wuṛṛu taweddu mawul᷊i ara'e anawoanna. Doronganna tawe iaringikka sasal᷊iomannu asasusa su manga lal᷊annu soan kite.

¹⁵ Lal᷊umanna'a su walahanna apan ereudde, lal᷊umanna'a su taumata apan Ruatane Mawu!