DARALO 143 - WUKE SUSI WATTI'U AL᷊AL᷊USASSA

Aal᷊iomanna maddorongnga aontolla

¹ Daralon Daud. Oh Mawu, daringiṛṛewe aal᷊iomanku, sengkamawe darorongku. Simbaṛṛewe i ya'u ana waugu apapia-Nu, tipussawe aal᷊iomangku ana waugu atatul᷊iddu Mawu.

² I ya'u indi allang-Ngu, ariewe i ya'u ṛuunganna, ana waugu tawe taumata apan tawe sal᷊ane su saruan-Nu.

³ See'u buatte nangenggenna si ya'u wuṛṛu namaddo'u, wuṛṛu nantaṛṛo'u sulal᷊ummu tattupanna apan marandumma; i ya'u nabbal᷊i ere taumata apan mal᷊annute nate.

⁴ I ya'u niasueanten ikkatta, naungku nial᷊iwunete.

⁵ I ya'u mannaungnga manga allo apan nal᷊iu; i ya'u maṛṛingiddu al᷊awo'u inolaan-Nu, nanaungangku anambon manara-Nu.

⁶ I ya'u u'al᷊iomanna Si'o ringannu lima uawilatta; naal᷊ihidda leta'a mamara, niawa'u luṛṛintulu-Nu.

⁷ Paal᷊ihakkawe sumimbakka si ya'u, oh Mawu, ana waugu i ya'u tate antimma. Ariewe pa'imbunie i ya'u, tadea'u i ya'u tawe ere taumata apan sinumossoke su runian papate.

⁸ Suapan marua allo i ya'u paanaungaawe darangngu-Nu, ana waugu ete Si'o i ya'u uaantimma. Pantingiraawe si ya'u lal᷊anna apan ta'u amatanna, ana waugu ete Si'o i ya'u umal᷊iomanna.

⁹ I ya'u nirumanta maddea'a pattillummanna Si'o, oh Mawu, pallosaawe i ya'u wuassu manga see'u.

¹⁰ Tantiroiwe i ya'u tumuṛṛutta apulu-Nu, ana waugu ete I'o Ruata'u. I'o masaṛṛionto'a, wuṛṛu sarun mangehetta si ya'u su lal᷊anna apan mal᷊aukka.

¹¹ Sal᷊amatewe i ya'u ere buatte nipa'ire-Nu, oh Mawu, ana waugu apapia-Nu, pallosaawe i ya'u wuassu asasusa.

¹² Ana waugu darangngu-Nu, patete anambon see'u, ṛadda'e anambon matataṛṛualanga si ya'u, ana waugu i ya'u allang-Ngu.