DARALO 141 - WUKE SUSI WATTI'U AL᷊AL᷊USASSA

Aal᷊iomannu ṛabbi

¹ Daralon Daud. I ya'u sussal᷊ande Si'o, oh Mawu, ontol᷊ewe paal᷊ihakka i ya'u! Daringiṛewe i ya'u napawe i ya'u sumal᷊ande Si'o.

² Sengkammawe aal᷊iomangku maola'a ere sambau sasamba amania, wuṛṛu lima'u apan uawilatta maola'a sasamban ṛabbi.

³ Oh Mawu, riagaiwe moṛṛongku wuṛṛu lu'arewe wiwi'u.

⁴ Paarauaawe i ya'u wuassu apulu ma'ola'a al᷊al᷊eo. Arie pabbala'a i ya'u maammulu taumata lal᷊eo wuṛṛu umanna suadio'a sulal᷊ummu andeangngi mangitou.

⁵ Amungkangu pia sangkatou taumata mapia mamo'a si ya'u, wuṛṛu ringannu naungnga mawawo mangaṛa'a si ya'u, udde naal᷊ihidda lana apan apianne si ya'u. Antimanna i ya'u tawe manola'a, ana waugu i ya'u sidutu u'al᷊iomanna mannal᷊are al᷊al᷊eon mangitou.

⁶ Napawe manga tembonanni mangitou iramme wuassu manga rampissu watu, i mangitou sarun manga'u manungku manga wisara'u atonna.

⁷ Manga duṛṛin kite sarun isal᷊iawukka su winggin labbinga naal᷊ihidda sambau watu niṛṛimunsa'a su leta'a.

⁸ Arawe i ya'u sidutu uaantimma Si'o, oh Mawu Ruata'u, arie pabbala'a i ya'u mate, ana waugu i ya'u uatillumma Si'o.

⁹ Lu'arewe i ya'u wuassu sedda apan nitaingnga si ya'u, wuṛṛu wuassu wal᷊ati'u manga taumata lal᷊eo udde.

¹⁰ Wala'e i mangitou umul᷊ussa sulal᷊ummu seddane sassane, arawe antimanna i ya'u masal᷊amatta.