DARALO 138 - WUKE SUSI WATTI'U AL᷊AL᷊USASSA

Aal᷊iomanna aadiangkamanna

¹ Wuassi Daud. Oh Mawu, i ya'u maadiangkamanna Si'o, ringannu ahewallu naungku. Su saruannu al᷊awo'u monganna i ya'u mangantari maddalo Si'o.

² I Ya'u umal᷊intudda uasaruanna Wal᷊en-Nu apan susi lapiddu maddalo aran-Nu, ana waugu I'o maakkanna wuṛṛu sidutu marangngu. I'o lembon manuungngu paaire-Nu wuassu addapattu taumata su ola'u watangan-Nu.

³ Sutempo i ya'u sussal᷊ande Si'o, I'o sinumimbakka, I'o nanohassa naungku na'oman sara i ya'u nabbal᷊i waṛṛani.

⁴ Anambon ratu su runia sarun maddalo Si'o, oh Mawu, ana waugu i mangitou naaringikke paaire-Nu.

⁵ I mangitou sarun mangantarin inolaan-Nu wuṛṛu su ola'u awawantu-Nu apan wahewalla.

⁶ I'o tumaniten susi, arawe lal᷊ebbone niellehan-Nu lai; taumata mawunga tawe mappa'imbuni Si'o.

⁷ Sutempo i ya'u niaṛṛiaannu asasusa, I'o mangke napawia'u. I'o nando'appa see'u apan tantal᷊anna mammangalo wuṛṛu nanal᷊amatta si Ya'u ringannu taṛṛino-Nu.

⁸ I'o sarun manipussa paaire-Nu si ya'u; ariewe mangillol᷊o mangaṛa'a al᷊aṛṛanang-Ngu.