DARALO 135 - WUKE SUSI WATTI'U AL᷊AL᷊USASSA

Aantari daralo

¹ Paddalote Mawu! Paddalote arannu Mawu, ei i yamiu manga allang-Nge

² apan mattaṛṛamawu su Wal᷊en Mawu tatanaannu Ruatan kite.

³ Paddalote Mawu, ana waugu i Tou mapia, paddalote aran-Ne, ana waugu i Tou masaṛṛionto'a.

⁴ I Tou namile si Yakub su watangan-Ne, wawosoannu Israel naola'a pussa'a-Ne.

⁵ Ana waugu i ya'u masingkatta Mawu wahewalla atonna, i Tou mawantuga nangillembo wuassu al᷊awo'u monganna.

⁶ I Tou mammanara apa apan ipaapulu-Ne, su langitta wuṛṛu su runia, su tahal᷊oangnga wuṛṛu su laudda apan mal᷊al᷊umma.

⁷ Wuassu pentakku runia i Tou nandantan winabbawa, i Tou na'ola'a sawallo hunan kuranna. Ana see i Tou namarenta anginna tadea'u sumabbangnga wuassu tampa pangaddoanne.

⁸ Su Mesir i Tou namate anambon ana'a pahul᷊u wuassu taumata ara'e winatangnga.

⁹ Poiaroddi i Tou na'ola'a manambo al᷊aṛṛindu'a wuṛṛu tatiala ipakkuumannu ratu wuṛṛu manga mamanarane.

¹⁰ I Tou naṛṛadda'a manambo walahanna, wuṛṛu namate manga ratu matatohassa:

¹¹ Sihon ratun Amori wuṛṛu i Og ratun Basan, see lai anambon ratu su Kanaan.

¹² Ana see i Tou nanantillu wanuan mangitou maola'a pussa'an Israel al᷊aṛṛanang-Nge.

¹³ Oh Mawu, I'o sidutu iapappasingkatta, wuṛṛu aran-Nu nannaungannu anambon papapulunna,

¹⁴ ana waugu I'o nangonggolu atatul᷊idda su al᷊aṛṛanang-Ngu, wuṛṛu niumakkannu manga allang-Ngu.

¹⁵ Paal᷊uanni mangitou wuassu wul᷊awanna wuṛṛu sal᷊a'a, nilanginnu liman taumata.

¹⁶ I mangitou pia moṛṛongnga, arawe tawe maawisara, pia mata, arawe tawe maasilo.

¹⁷ I mangitou pia tal᷊inga, arawe tawe maaringikka, wuassu moṛṛongnge tawe sumabbanga singangu.

¹⁸ Antimanna etearoddi pal᷊addu manga taumata mallal᷊anginne, wuṛṛu apan mangngimanna si tou.

¹⁹ Paddalote Mawu, ei umattu Israel, paddalote si Tou, ei manga imammu Ruata!

²⁰ Paddalote Mawu, ei manga taumatan Lewi, paddalote si Tou, i yamiu sarangkanambone apan ma'imanna.

²¹ Paddalote Mawu su Sion, su Yerusalem tampa atatanaan-Ne. Paddalote Mawu!