DARALO 132 - WUKE SUSI WATTI'U AL᷊AL᷊USASSA

Daralo su Wal᷊en Mawu

¹ Aantarin patatembo. Oh Mawu, naungewe i Daud, wuṛṛu al᷊awo'u asasusane.

² Arie paabul᷊iane pasasubbane Si'o Mawu, su riandine Si'o Apan Lembon matohassa, Ruatan Yakub.

^3-4 Wisarane, “I ya'u tawe mangillol᷊o su wal᷊e'u ara'e matiilla su tampan tatiil᷊angku,

⁵ tantal᷊anna i ya'u taambe napararisikku wal᷊en Ruatan Yakub, tampa tatanaannu Mawu Apan Lembon matohassa.”

⁶ Su Betlehem i ite naaringikka ola'u Wantalu Paaire, ana see niasangkal᷊anna su wadda'u Yaar.

⁷ Wette i ite inaite su tampa tatanaannu Mawu, wuṛṛu massubba si Tou su saruannu aianan-Ne.

⁸ Rantate wuṛṛu atana'e su Wal᷊en-Nu, oh Mawu, suadio'a ringannu Wantalu Paaire, tatialan taṛṛino-Nu.

⁹ Antimanna al᷊aṛṛanang-Ngu humio lullala'a, wuṛṛu manga imam tatahuanan-Nu sidutu mabbiakka tuttuṛṛutta apulu-Nu.

¹⁰ Ringannu aranni Daud, allang-Ngu, ariewe mapawelengu ratu nipile-Nu.

¹¹ Mawu buatte nassalu si Daud; i Tou tawe massinaaddu paaire-Ne. Wisara-Ne, “Sangkatou anangngu sarun Ta'u itenega ratu iapaparenta mallol᷊ossa si'o.

¹² Amungkangu manga anangngu matuṛṛutta su paaire-U, wuṛṛu maddaringikka manga parenta-U, ne saran mal᷊annu-l᷊annu papapulunni mangitou mallol᷊ossa si'o maola'a ratu.”

¹³ Ana waugu Mawu buatte namile Sion; i Tou mappulu maola'a tampa atatanaan-Ne.

¹⁴ Wisara-Ne, “Ete isindi atatanaang-Ku saran mal᷊annu-l᷊annu, i Ya'u maapulu mamarenta sutampa indi.

¹⁵ Al᷊awo'u hausanne sarun Ta'u suunganna ringannu manambo, manga taumata asiangnga Ta'u iapaanna ma'oman sara mal᷊aidda.

¹⁶ Manga imammi mangitou namasilon asasal᷊amatta wuassia-U; tumanangnge sarun mangngantari wuṛṛu lumala'a.

¹⁷ Isindi sangkatou papapulunni Daud sarun Ta'u itenega ratu; pamamarentane sarun Ta'u tohassanna.

¹⁸ Araratuanne sarun sidutu su lal᷊umanna'a, arawe manga seenne sarun pansilianna.”