DARALO 13 - WUKE SUSI WATTI'U AL᷊AL᷊USASSA

Aal᷊iomannu taumata apan niumpisananna

¹ Su piaṛṛa'u mangangantari. Daralon Daud.

² Ma'oman sara tingera I'o maabul᷊i'u oh Mawu? Ma'oman sara tingera I'o ma'imbuni si ya'u?

³ Ma'oman sara tingera i ya'u ṛinone uapendamma asasusa, wuṛṛu naungku massusa su al᷊o'engngu allo? Ma'oman sara tingera i ya'u tataṛṛinoannu seetta?

⁴ Ellehete i ya'u, oh Mawu Ruata'u, simbaṛṛewe aal᷊iomangku. Welengaawe atatoha'u, wuṛṛu arie pabbala'a i ya'u mate.

⁵ Arie pabbala'a see'u mabbisara manungku i mangitou buatte namaddo'u. Arie pabbala'a i mangitou manappissi'a si ya'u.

⁶ Ana waugu i ya'u mangngasakku darangngu-Nu, ne i ya'u sarun lumuassa ana waugu I'o nanal᷊amatta si ya'u. I ya'u maapulu mangantari maddalo Mawu, ana waugu i Tou buatte na'ola'a apapia si ya'u!