DARALO 12 - WUKE SUSI WATTI'U AL᷊AL᷊USASSA

Aal᷊iomanna maddorongnga aontola

¹ Su piaṛṛa'u mangangantari. Tumuṛṛuttu antari aual᷊une. Daralon Daud.

² Ontol᷊ewe i yami, oh Mawu, ana waugu tate lai taumata mapia, taumata apan matuṛutta Si'o nawul᷊ite.

³ I mangitou sarangkanambone uawawahia, uawawahia ringannu manga wisara apan manenengnga.

⁴ Paillol᷊oa'e manga wisara apan massal᷊o'a udde, Mawu, paal᷊addawa'e manga taumata apan matal᷊umama,

⁵ apan mabbisara, “I yamiu uataṛino ringannu lilan kami! Walate i yami mabbisara, wuṛṛu tawedu wotongnge manal᷊are!”

⁶ Wisaran Mawu, “Taumata asiangnga a'umpisananna wuṛṛu taumata susa sussal᷊iomanna. Ne orassa udde lai i Ya'u rumanta mangonggolu langnganna apan aantimanni mangitou.”

⁷ Paairen Mawu matohassa wuṛṛu iaawansaga, naal᷊ihidda sal᷊a'a tutune apan niannamma sulal᷊ummu putungnga.

^8-9 Taumata lal᷊eo mammal᷊apiddu al᷊awo'u tampa, al᷊al᷊eo raddaloannu al᷊awo'u taumata. Arawe I'o uasirungnga si yami, oh Mawu, lu'arewe i yamiu su saruannu manga taumata lal᷊eo udde.