DARALO 118 - WUKE SUSI WATTI'U AL᷊AL᷊USASSA

Aal᷊iomanna aadiangkamanna ana waugu naauntunga

¹ Paadiangkamante su Mawu ana waugu i Tou mapia, darangngu-Ne tawe panguddusanne.

² Ṛinone taumatan Israel mabbisara, “Darangngu-Ne tawe panguddusanne.”

³ Ṛinone manga imam mabbisara, “Darangngu-Ne tawe panguddusanne.”

⁴ Ṛinone anambon taumata ma'imanna mabbisara, “Darangngu-Ne tawe panguddusanne.”

⁵ Sulal᷊ummu asasusa'u i ya'u sussal᷊ande su Mawu; ana see i Tou sinumimbakka wuṛṛu namallo'u i ya'u nipallossa.

⁶ I ya'u tawe mata'utta ana waugu Mawu uarundinganna si ya'u, taumata tawe maal᷊ore su saruangku.

⁷ Mawu uarundinganna si ya'u tadea'u mantul᷊ungku, i ya'u sarun mabbiala see'u iawaddo.

⁸ Mappianne uatillumma su Mawu, sul᷊ungnge'e mangasakku taumata.

⁹ Mappianne uatillumma su Mawu, sul᷊ungnge'e mangantimma papunna.

¹⁰ Manambo seetta uapal᷊iwutta si ya'u; ringannu taṛṛinon Mawu, i mangitou ta'u niawaddo.

¹¹ I mangitou namangalo si ya'u wuassu al᷊awo'u pappi'uanne; ringannu taṛṛinon Mawu, i mangitou ta'u niawaddo.

¹² Naal᷊ihidda atimpua i mangitou uaṛṛimpulunna si ya'u; ringannu taṛṛinon Mawu, i mangitou ta'u niawaddo. Sulal᷊ummu sangkaṛṛondappa i mangitou nipaddumma naal᷊ihidda putungnga nanoṛṛoba anggaṛṛumunanne.

¹³ I ya'u nipangaloanna ringannu masaddata, wuṛṛu maraniten manawo, arawe Mawu nantul᷊ungku.

¹⁴ Mawu uddewe atatoha'u wuṛṛu raddaloangku, i Tou buatte nanal᷊amatta si ya'u.

¹⁵ Paddaringikke hion naauntunga su manga rasannu al᷊aṛṛanang-Nge, “Mawu na'ola'a inolaanna wahewalla!

¹⁶ Taṛṛinon Mawu nangonggolu auntunganna si ite! Mawu na'ola'a inolaanna wahewalla.”

¹⁷ I ya'u natete, arawe sidutu wiakka tadea'u mamasingkattu manaran Mawu.

¹⁸ Mawu buatte nanansara si ya'u ringannu lembone, arawe i Ya'u tawe tinantilli tou su papate.

¹⁹ I ya'u pamu'aewe ngara wahewallu Wal᷊en Mawu, tadea'u i ya'u sumutta wuṛṛu maadiangkamanna si Tou.

²⁰ Indite ngara wahewallu Mawu, tumba'u taumata matul᷊idda maasutta.

²¹ I ya'u maddalo Si'o, ana waugu I'o naddaringikka aal᷊iomangku; I'o buatte nangonggolu auntunganna si ya'u.

²² Watu apan niramme manga maaola'a wal᷊en, naola'e watu sasarianne.

²³ Eteudde inolaannu Mawu, mangke maatiangnga si ite.

²⁴ Eteindi allo apan nitantunnu Mawu; wette ilaghun kite ringannu lal᷊ala'a.

²⁵ I yami sumal᷊ande, Mawu, sal᷊amatewe i yami, oh Mawu, i yami onggol᷊eten auntunganna!

²⁶ Nial᷊amatante i tou apan nirumanta ringannu arannu Mawu, i yami mangal᷊amatta si yamiu wuassu Wal᷊en Mawu.

²⁷ Mawu uddewe Ruata, i Tou naungnge masaṛṛionto'a si ite. Inaite amatte suadio'a ringannu rannan kalu aagasanna, wuṛṛu pamal᷊iwutte mezbah Mawu.

²⁸ I'o Ruata'u, i ya'u maadiangkamanna Si'o, Ruata'u, i ya'u mamantuga Si'o.

²⁹ Paadiangkamante su Mawu ana waugu i Tou mapia, darangngu-Ne tawe pattaal᷊anne.