DARALO 116 - WUKE SUSI WATTI'U AL᷊AL᷊USASSA

Nal᷊iu wuassu papate

¹ I ya'u mandangngu Mawu, ana waugu i Tou naddaringikka si ya'u wuṛṛu nangutungu darorongku.

² I Tou naddaringikka si ya'u, suapawe i ya'u sumal᷊ande si Tou.

³ I ya'u uasaruante papate; atata'uttu papate uaarunte si ya'u, naaola'a si ya'u sussinggawanga wuṛṛu matta'utta.

⁴ Ne i ya'u sinumal᷊ande Mawu, “Oh Mawu, i ya'u sumal᷊ande, sal᷊amatewe i ya'u!”

⁵ Mawu udde marangngu wuṛṛu matul᷊idda; Ruatan kite napenen aakkanna.

⁶ Mawu mappadul᷊i taumata mabbiakka mawawo; sutempo i ya'u lome I'o nanal᷊amatta si ya'u.

⁷ I'o napatammudu naungku, ana waugu Mawu mapia si ya'u.

⁸ Mawu buatte nalliu'u wuassu papate, i Tou nallimbatta si ya'u wuṛṛu tawe niwalane manawo.

⁹ Ne i ya'u wotongnge maapendamma mabbiakka su runia indi, sulal᷊ummu lu'addu Mawu.

¹⁰ I ya'u sidutu mangimanna, salaiwe i ya'u mabbisara, “I ya'u tumaniten niallangnga.”

¹¹ Sulal᷊ummu al᷊ingu'u i ya'u nabbisara, “Tawe saran sangkatou apan wotongnge pangimananna.”

¹² Apa apan ta'u ionggola su Mawu, ipabbal᷊issa apapia-Ne si ya'u?

¹³ I ya'u sarun mangapiddu sasamba anggore su Mawu ipaadiangkamanna ana waugu i Tou nantul᷊ung-Nge.

¹⁴ I ya'u sarun manipussu paaire'u si Tou su saruannu anambon al᷊aṛṛanang-Nge.

¹⁵ Mawu tumaniten mappau papaten sangkatou apan arangnguan-Ne.

¹⁶ I ya'u indi allang-Ngu, oh Mawu, ere inangku, i ya'u lai mattaṛṛamawu Si'o I'o buatte napasabbangku wuassu tattupanna.

¹⁷ I ya'u sarun mangapiddu sasamba aadiangkamanna Si'o, lapiddu manduittu aal᷊iomanna Si'o.

¹⁸ I ya'u sarun manipussu paaire'u su Mawu, su saruannu anambon al᷊aṛṛanang-Nge

¹⁹ apan usemodda su rallakku Wal᷊en Mawu, su pattangngannu soa Yerusalem. Paddalote Mawu!