DARALO 115 - WUKE SUSI WATTI'U AL᷊AL᷊USASSA

Daralo su Ruata Apan Lembontaṛṛino

¹ Wal᷊ine i yami, oh Mawu, wal᷊ine i yami, arawe tumba'u I'o apan raddaloanna, ana waugu I'o mapia wuṛṛu sidutu marangngu.

² Anio manga walahanna mabbisara, “Suapate Ruatan mangitou?”

³ Ruatan kite su surga, i Tou mammanara apa apan ipaapulu-Ne.

⁴ Paal᷊uanni mangitou wuassu wul᷊awanna wuṛṛu sal᷊a'a, nilanginnu liman taumata.

⁵ I mangitou pia moṛongnga, arawe tawe maawisara, pia mata, arawe tawe maasilo.

⁶ I mangitou pia tal᷊inga, arawe tawe maaringikka, pia ngirunna, arawe tawe maasimbua.

⁷ I mangitou pia ta'iakka, arawe tawe maasaṛṛipo, i mangitou pia ledda, arawe tawe maamatta, wuṛṛu tawe tingikka apan sumabbanga wuassu tonggol᷊anne.

⁸ Antimanna etearoddi pal᷊addu manga taumata apan nallanginna, wuṛṛu anambon taumata apan mangngimanna si tou.

⁹ Ei Israel, pangantimpe Mawu, ete i Tou apan mangontolla wuṛṛu manillumma si yamiu.

¹⁰ Ei manga imam, pangantimpe Mawu, ete i Tou apan mangontolla wuṛṛu manillumma si yamiu.

¹¹ Ei anambon taumata ma'imanna, pangantimpe Mawu, ete i Tou apan mangontolla wuṛṛu manillumma si yamiu.

¹² Mawu uanaungnga si ite wuṛṛu sarun mangal᷊amatta si ite, i Tou sarun mangal᷊amatta umattu Israel wuṛṛu anambon imam papapulunni Harun.

¹³ I Tou sarun mangal᷊amatta manga taumata apan ma'imanna, mawae ete maradio'a aroddi lai wahewalla.

¹⁴ Antimanna Mawu mangonggolu manambo ana'a, si yamiu wuṛṛu papapulunnu.

¹⁵ Antimanna i yamiu al᷊amatannu Mawu, mandariaddi langitta wuṛṛu runia!

¹⁶ Langitta tumba'u pussa'an Mawu, arawe runia nionggolu Mawu su taumata.

¹⁷ Mawu tawe raddaloannu taumata nate, ara'e taumata apan sinumossoke su tampa mal᷊annabba.

¹⁸ Arawe i ite apan wiakka maadiangkamanna si Tou, orassa indi maddatingngu saran mal᷊annu-l᷊annu. Paddalote Mawu!