DARALO 110 - WUKE SUSI WATTI'U AL᷊AL᷊USASSA

Mawu wuṛṛu ratu nipile-Ne

¹ Daralon Daud. Mawu nabbisara si tuangku, “A'iante su samba'a uanang-Ku, ma'oman sara manga seennu Ta'u iapasuṛṛubbawa si'o.”

² Wuassu Sion Mawu sarun manggewalla araratuannu; pamarentate manga seennu!

³ Su allo apan rumanta ringannu taṛṛino, su wuidda apan susi, tumana'u soanu sarun inai ringannu naungnga mal᷊uassa. Naal᷊ihidda angngukka sutempo marua allo, manga umbasanna rumantate ringannu.

⁴ Ringannu sasalu Mawu buatte na'ire, i Tou tawe mangul᷊e apia, “Ete I'o imam sarangkal᷊o'engnge, ere i Melkisedek.”

⁵ Mawu udde su samba'a uanannu, napawe i Tou masa'u, manga ratu iwaddo-Ne.

⁶ I Tou sarun makkuumannu manga walahanna, na'oman sara manga winal᷊unanna uatal᷊eṛonga. I Tou sarun mamate manga tembonanne su ahewallu runia.

⁷ Ratu sarun ma'inumma ua'en sal᷊ukka su winggin dal᷊anna, napawe nitohassa, i tou sarun maauntunga.