DARALO 108 - WUKE SUSI WATTI'U AL᷊AL᷊USASSA

Aal᷊iomanna maddoronga aontola su saruannu seetta

¹ Aantari. Daralon Daud.

² I ya'u mangimanna atonna, oh Ruata, i ya'u maapulu mangantari wuṛṛu maddalo Si'o. Ei, atimpu'ote, niawa'u!

³ Ei atimpu'ote, gambus wuṛṛu kecapi! I ya'u maapulu mamu'o matannallo.

⁴ Mawu, i ya'u maapulu maadiangkamanna Si'o suwallatu manga walahanna. I ya'u maapulu mangantarin daralo Si'o suwallatu umattu taumata.

⁵ Ana waugu darangngu-Nu wahewalla naddatingngu langitta, wuṛṛu apapia-Nu naddatingngu winabbawa.

⁶ Oh Ruata, pal᷊iatta'e awawantu-U su langitta, wuṛṛu asasenak-Ku su ahewallu runia.

⁷ Sal᷊amatewe i yami ringannu taṛṛino-Nu, simbaṛṛewe aal᷊iomanni yami, tadea'u taumata apan arangnguan-Nu iapasal᷊amatta.

⁸ Wuassu atatanaan-Nu apan susi Ruata nabbisara, “I Ya'u maapulu lumala'a wuṛṛu mattahia leta'u Sikhem, Wawal᷊annu Sukot sarun Ta'u iundi.

⁹ Gilead wuṛṛu Manasye uddewe pussa'a-U, Efraim araposa waja-U, wuṛṛu Yehuda ta'innu araratuang-Ku.

¹⁰ Arawe Moab uddewe tampa pangukkasanna ledda-U; i Ya'u lumala'a ana waugu naauntunga su Filistea. Su Edom Ta'u tinuntunga apampakku ledda-U, maola'a tatiala manungku i tou pussa'a-U.”

¹¹ Isai apan mangapi'u watukku Edom? Isai mangehetta si ya'u watukku soa apan pia tatandange watu udde?

¹² Oh Ruata, I'o talawe tumantalonga suadio'a ringanni yami? I'o talawe inai suadio'a ringannu tantaran kami?

¹³ Ontol᷊ewe i yami su saruannu seetta, ana waugu sasumbalan taumata tawe gunane.

¹⁴ Suadio'a ringannu Ruata, i ite sarun waṛṛani wuṛṛu matohassa; Ete i Tou apan namaddon seetti ite.