DARALO 107 - WUKE SUSI WATTI'U AL᷊AL᷊USASSA

WUKE AL᷊IMANE: DARALO 107–150 Paddalote su apapian Mawu

¹ “Paadiangkamante su Mawu ana waugu i Tou mapia, darangngu-Ne sarangkal᷊o'engnge.”

² Wisara'e paasokka, ei i yamiu apan buatte niapasal᷊amatta wuassu asasusa.

³ I yamiu buatte nihemon-Ne wuassu manga wanua awagananna, wuassu ra'i wuṛṛu waṛṛatta, sawannakka wuṛṛu timukka.

⁴ Piaddu mammal᷊intaddu wadda'a mal᷊alangnga, wuṛṛu awagananna lal᷊anna watukku soa.

⁵ I mangitou niamal᷊unusanna wuṛṛu marou wuṛṛu niawul᷊iannu al᷊awo'u antimma.

⁶ Sulal᷊ummu asasusa i mangitou ma'ial᷊are su Mawu, wuṛṛu i Tou namallossi mangitou wuassu asasusa.

⁷ I Tou nangehetta si mangitou niumamattu lal᷊anna matul᷊idda sutampa atatanaanna su soa.

⁸ Ṛinone i mangitou maadiangkamanna su Mawu ana waugu darangngu-Ne, ana waugu manga manara-Ne apan maatiangnga taumata.

⁹ Ana waugu i Tou napa'inummu taumata apan marou, wuṛṛu nangonggola su taumata apan mal᷊unussu al᷊awo'a apan mapia.

¹⁰ Piaddu uataṛṛo sulal᷊ummu ararandumma, taumatan tattupanna uatataṛṛangnga sulal᷊ummu mantunga atta'a,

¹¹ ana waugu i mangitou buatte nilumawanga Ruata wuṛṛu tawe maddaringikka parentan Apan Atanggaṛṛanne.

¹² I Tou nakkimunsa'a naungngi mangitou ringannu manara mawakkatta; i mangitou nanawo wuṛṛu tawedu mangontolla.

¹³ Sulal᷊ummu asasusa i mangitou ma'ial᷊are su Mawu, wuṛṛu i Tou namallossi mangitou wuassu asasusa.

¹⁴ I Tou nangapiddi mangitou sinumabbangnga wuassu ararandumma, wuṛṛu namaddi mantungi mangitou.

¹⁵ Ṛinone i mangitou maadiangkamanna su Mawu ana waugu darangngu-Ne, ana waugu manga manara-Ne apan maatiangnga taumata.

¹⁶ Ana waugu i Tou napaṛṛan manga ngara witu'a, wuṛṛu nakkimunsa'a manga sal᷊aba'u atta'a.

¹⁷ Piaddu longonna wuṛṛu uatataṛṛangnga ana waugu manga rosan mangitou, wuṛṛu nisansaranna ana waugu pasasal᷊an mangitou.

¹⁸ I mangitou nuallu al᷊awo'u anna, papaten mangitou maranite.

¹⁹ Sulal᷊ummu asasusa i mangitou ma'ial᷊are su Mawu, wuṛṛu i Tou namallosi mangitou wuassu asasusa.

²⁰ I Tou napaapian mangitou ringannu parenta-Ne, wuṛṛu nalliun mangitou wuassu loṛṛangngu labbinga.

²¹ Ṛinone i mangitou maadiangkamanna su Mawu ana waugu darangngu-Ne, ana waugu manga manara-Ne apan maatiangnga taumata.

²² Wala'e i mangitou maadiangkamanna ringannu uaapiddu sasamba, wuṛṛu mabbatti'u inolaan-Ne ringannu manga aantarin lal᷊uassa.

²³ Piaddu lai mattahal᷊oanga uasa'e apalla, maddea'a lal᷊annu pabbiaṛṛanna su tahal᷊oangnga mal᷊alangnga.

²⁴ I mangitou naasilo manga inolaannu Mawu, manga manara-Ne apan maatiangnga su tahal᷊oangnga.

²⁵ Wuassu parenta-Ne tinumiuppe anginna al᷊isusu wuṛṛu tahal᷊oangnga nattandi'e.

²⁶ Manga apalla nawengketta watukku winalanganna, ana see niema'a su wantan laudda. Manga taumata niawul᷊iannu awawaṛani sumaruanna asasilaka ahewalle udde.

²⁷ I mangitou tinangngone wuṛṛu maṛṛaate ere taumata wu'anna wuṛṛu niawul᷊iannu ṛingidda.

²⁸ Sulal᷊ummu asasusa i mangitou sussal᷊ande Mawu, ne i Tou namallosi mangitou wuassu asasusa.

²⁹ Tandi'a apan mandasakka nirolokku Mawu niapal᷊enakka, manga lua'a lai nallannabba.

³⁰ I mangitou mal᷊uassa ana waugu tandi'a nal᷊iute; i Tou nangapiddi mangitou watukku pabbal᷊angoanna apan tuddanna.

³¹ Ṛinone i mangitou maadiangkamanna su Mawu ana waugu darangngu-Ne, ana waugu manga manara-Ne apan maatiangnga taumata.

³² I mangitou mammasingkatu awawantugu Mawu su tangngan al᷊aṛṛanang-Nge, wuṛṛu maddalo si Tou sulal᷊ummu ammul᷊annu matatimmade.

³³ Manga sal᷊ukka niwal᷊u-Ne nabbal᷊i wadda'a al᷊imatan kua'e nabbal᷊i leta'a maṛṛasa.

³⁴ Leta'a masuwukka niolang-Nge wadda'u asimma, ana waugu al᷊al᷊eon manga taumata apan uawanua isudde.

³⁵ Wadda'a niwal᷊u-Ne nabbal᷊i li'u pia ua'e, leta'a mamara nabbal᷊i al᷊imatan kua'e.

³⁶ Manga taumata mal᷊unussa niapatanang-Nge poiaroddi; i mangitou napararisikku soa maola'a tatanaanni mangitou.

³⁷ Manga wailli mangitou niasi'anna wuṛṛu nisuanannu manga punnu alu anggore, ana see nangammulu wuane apan manambo-nambo.

³⁸ Mawu nangonggolu ana'a manambo si mangitou, wuṛṛu winatangngi mangitou sidutu aatambanna.

³⁹ Arawe i mangitou niawaddo wuṛṛu ete matul᷊unga lambene ana waugu asasusa wuṛṛu pangangallanga apan nangillembo.

⁴⁰ Mawu namawon manga tembonanni mangitou, wuṛṛu nandolokki mangitou mammal᷊intaddu wadda'a apan tawe dal᷊anne.

⁴¹ Arawe taumata asiangnga nilliu-Ne wuassu asasusan mangitou, amonanni mangitou aatambanna ere ammul᷊annu domba.

⁴² Taumata matul᷊idda naasilo wuṛṛu lulluassa, arawe taumata lal᷊eo nimmoune.

⁴³ Antimanna taumata pande maṛṛingiddu anambon olangnge udde wuṛṛu manga'u manungku Mawu sidutu marangngu.