DARALO 105 - WUKE SUSI WATTI'U AL᷊AL᷊USASSA

Ruata wuṛṛu al᷊aṛṛanang-Nge

¹ Paadiangkamante su Mawu, pasingkata'e awawantu-Ge, wattia'e inolaan-Ne su manga walahanna.

² Pangantariten daralo su Mawu, wattia'e al᷊awo'u manara-Ne apan maatiangnga.

³ Ete i Tou Mawu Apan Lembonsusi; lallala'e ana waugu i ite pussa'a-Ne, sarangkanambone apan massubba ṛinone lumuassa.

⁴ Paddorongke atatohassa wuassi Tou, passubbate si Tou sidutu.

^5-6 Ei papapulunni Abraham, allang-Nge, wuṛṛu papapulunni Yakub, taumata nipile-Ne, naungete anambon al᷊aṛṛindu'a apan niolang-Nge, imbaṛṛangnga maabul᷊in manga parenta-Ne.

⁷ Mawu uddewe Ruatan kite, parenta-Ne iapaamatta su ahewallu runia.

⁸ I Tou sidutu uanaungnga paaire-Ne, paaire-Ne iapaamatta saran mal᷊annu-l᷊annu.

⁹ Paaire udde niolang-Nge si Abraham, wuṛṛu wua'udde si Ishak;

¹⁰ ana see nitohassa si Yakub, maola'a paaire sarangkal᷊o'engnge su umattu Israel.

¹¹ Wisara-Ne, “Leta'u Kanaan sarun Ta'u iongolla si'o, maola'a leta'a pussa'anu.”

¹² Dorone al᷊aṛṛana'u Ruata mabbiakka ere taumata raho poiaroddi reenganni mangitou tumba'u addio'a.

¹³ I mangitou mammal᷊intadda ringannu walahanna sambau watukku walahanna waine, nangingkatta wuassu wanua sambau watukku wanua waine.

¹⁴ Arawe Mawu tawe namalan mangitou allanganni sai-sai; ana waugu i mangitou, manga ratu niapanaung-Nge.

¹⁵ “Imbaṛṛangnga manal᷊awa'u manga taumata nipile-U, imbaṛṛangnga ma'ola'a al᷊al᷊eo su manga nabi-U!”

¹⁶ Mawu nandantan ṛutumma su wanua udde, wuṛṛu nanganu wiakke apan buatte nisaddia.

¹⁷ Arawe i Tou nandolokku sangkatou niapal᷊iu doṛene si mangitou, Yusuf, apan buatte niwal᷊u'a maola'a allangnga.

¹⁸ Leddane niṛṛapussu mantungnga, ullekkane niwul᷊eleannu ṛate atta'a.

¹⁹ Panginsueanne natipusse apa aantimanne, i tou niapaṛṛinon ṛengetannu Mawu.

²⁰ Ana see ratun Mesir, tembonannu manga walahanna, namallossi tou wuassu tattupanna.

²¹ I Tou tinantil᷊annu manara mallu'adda wal᷊en araratuanna, wuṛṛu nipangimananna su anambon darotongnge;

²² wuṛṛu lai pia taṛṛino mangatokku manga mamanaran ratu, wuṛṛu mamiaṛṛa'u manga matatimmade.

²³ Ana see i Yakub inaite watukku Mesir wuṛṛu namanuate poiaroddi naola'a taumata raho.

²⁴ Mawu na'ola'a al᷊aṛṛanang-Nge aatambanna anambone, na'oman sara i mangitou mattohasanna wuassu ro'amme.

²⁵ I Tou namal᷊u naungngu taumatan Mesir na'oman sara narantinnu al᷊aṛṛanang-Nge, wuṛṛu nakkagissa manga allang-Nge.

²⁶ Ana see i Tou nandolokki Musa allang-Nge wuṛṛu i Harun taumata nipile-Ne.

²⁷ Su Mesir itarua na'ola'a manga al᷊aṛindu'a, manga inolaanna wahewalla wuassu Mawu,

²⁸ wuṛṛu itarua mararingikka parenta-Ne. Ana see Mawu na'ola'a wanua udde wasa tuudda.

²⁹ Sal᷊ukki mangitou niwal᷊u-Ne nabbal᷊i daṛṛa, na'oman sara inassa sarangkanambone naṛṛadda'a.

³⁰ Aakka sussassolo'a su wanuan mangitou, ewe'e lai sinumutta sulal᷊ummu wal᷊en araratuanna.

³¹ Wuassu parentan Duata nirumantate manga lango, wuṛṛu manga namu'a namenete ahewallu wanua.

³² I Tou nangansallu eisse pinallol᷊ossa uranna, wuṛṛu nandantan sawallo apan ma'ilatta.

³³ I Tou namatangngu punnu anggore wuṛṛu punnu ara, wuṛṛu napaṛṛa'a anambon manga aaluanni mangitou.

³⁴ Wuassu parenta-Ne, nirumantate taṛṛangassa, reenganne tumaniten manambo, tawe iareengnga.

³⁵ I mangitou nanaṛṛangassa anambon sasuanna su wawail᷊anna, wuṛṛu niumanna na'oman sara nasue anambon wuan sinuananna.

³⁶ Ana see namate ana'a esakka pahul᷊une sulal᷊ummu sambau amonannu taumatan Mesir.

³⁷ Wua'udde walahannu Israel niapiddu Mawu sinumabbangnga, i mangitou uaapiddu wul᷊awanna wuṛṛu sal᷊a'a; sarangkanambone mapia wuṛṛu matohassa.

³⁸ Taumatan Mesir niaṛṛiaannu atata'utta wuṛṛu asasinggawanga, nariaddi i mangitou mal᷊uassa napawe taumatan Israel napul᷊ete.

³⁹ Ruata namataddu winabbawa ipanirungnga al᷊aṛṛanang-Nge, wuṛṛu putungnga ipanemakka sutempo ṛabbi.

⁴⁰ I mangitou naddorongnga, ana see niaparanta-Ne manu'a puyuh, i mangitou nionggol᷊an-Ne roti wuassu surga na'oman sara nal᷊aidda.

⁴¹ Niwa'a-Ne wowone watu, ana see sinumabbangke ua'e apan mangngelekka ere sal᷊ukka su wadda'a.

⁴² Ana waugu Mawu uananungnga paaire-Ne si Abraham, allang-Nge.

⁴³ Ne al᷊aṛṛanang-Nge niehen-Ne ringannu al᷊al᷊uassa, manga taumata nipile-Ne ringannu hio lullala'a.

⁴⁴ Leta'u manga walahanna nionggolu Mawu si mangitou, manga wawail᷊anni mangitou naola'a pussa'an al᷊aṛṛanang-Nge,

⁴⁵ tadea'u al᷊aṛṛanang-Nge udde matuṛutta su manga tita-Ne wuṛṛu maddaringikka manga parenta-Ne. Paddalote Mawu!