DARALO 104 - WUKE SUSI WATTI'U AL᷊AL᷊USASSA

Paddalote mandariaddi

¹ Paddalote Mawu, ei ṛimuu'u! Aroddi awantuge I'o, oh Mawu Ruata'u! I'o uapeddettu araṛṛamaga wuṛṛu araṛṛansangnga,

² wuṛṛu aoosannu asasemakka. I'o namataddu langitta ere rasanna,

³ wuṛṛu napararisikku Wal᷊en-Nu su wowon ua'e su winalanganna. Manga winabbawa niolang-Ngu kereta-Nu, I'o uasa'e papaiddu anginna.

⁴ Anginna niolang-Ngu daroloṛṛan-Nu, wuṛṛu sawallo mangangimbe-Nu.

⁵ Ringannu matohassa runia nipararisik-Ku su sasarianne, na'oman sara tawe umio'a sarangkal᷊o'engnge.

⁶ I'o nami'unna ringannu laudda mal᷊alangnga, ua'ene nangammo manga puiddu panenteanna.

⁷ Sutempo I'o namuṛṛeangnga, ua'e udde nangelekka, nangelekka ringannu masassaga ana waugu rallu'u tingik-Ku.

⁸ Ua'e nangelekka wuassu manga wowone watukku wawal᷊anne, watukku tampa apan buatte nisaddia-Nu si tou.

⁹ I'o nanantunna manga passaranna apan i tou tawe maal᷊iu, tadea'u tawe maawelengnga mangammon dunia.

¹⁰ I'o napaal᷊iwombongu al᷊imatan kua'e su manga wawal᷊anne, ana'u sal᷊ukka mangngelekka suwallattu manga wuidda,

¹¹ tadea'u mapa'inummu anambon winatangnga su wawail᷊anna, wuṛṛu mamallossu araroun manga keledain ahuranganna.

¹² Maranine manga manu'u winalanganna na'ola'a sal᷊akka; i mangitou mangngantari suwallattu manga rongnga.

¹³ Wuassu langitta I'o nanossokku uranna su panenteanna, runia nepenen lanna'u manara-Nu.

¹⁴ I'o napatuwon nannal᷊o maola'a wiakku winatangnga, wuṛṛu su taumata al᷊awo'u hatin sasuanna. Ne i tou wotongnge mabbailla,

¹⁵ wuṛṛu napasabbangu ua'e anggore apan maal᷊uassa. See lai lanan zaitun apan maatilangnga hatine, wuṛṛu anna apan mangngonggolu atatohassa si tou.

¹⁶ Manga punnu alu Mawu naasomba uranna manambo punnu alu cemaran Libanon apan nisuan-Ne sassane.

¹⁷ Isudde nassal᷊akke manga manu'u winalanganna, manu'a waṛṛoa nassal᷊akka su puidde.

¹⁸ Manga wowone matanggakka naola'a tampan ambingu ahuranganna, pelanduk na'imbuni su watun sahatta.

¹⁹ I'o na'ola'a wul᷊anna mabbal᷊i tatiala su orassa, matannallo masingkattu tempone i tou umatuppa.

²⁰ napawe I'o manossokku ararandumma, allo mabbal᷊i ṛabbi, wuṛṛu anambon winatangngu ahuranganna lullallele.

²¹ Manga singa saṛṛen tumuwo mammiṛonganna maddea'a wiakke, maddorongnga anna apan buatte nisaddian Duata.

²² Napawe matannallo sumabbangke, i mangitou massal᷊iu wuṛṛu lumallowanga su tampa pa'imbunianne.

²³ Ana see sumabbangke taumata mammanara, wuṛṛu sidutu mammanara maddatingngu wawallo.

²⁴ Aroddi anambone lanna'u manara-Nu, Mawu, sarangkanambone niolang-Ngu ringannu apande; runia napenen lanna'u lima-Nu.

²⁵ Pa'ellege tahal᷊oangnga mal᷊alangnga uawannadda, ringannu riaddanna wahewalla addio'a tawe iareengnga.

²⁶ Isudde manga apalla massenggotta, wuṛṛu Lewiatan, nagu su tahal᷊oangnga riadian-Nu, mannalangnga.

²⁷ I mangitou sarangkamabone mangngantimma Si'o, tadea'u maasomba anna sutempone.

²⁸ I'o mangngonggola, wuṛṛu i mangitou mangangammulle, I'o mananaddiane, wuṛṛu i mangitou niumanna na'oman sara nal᷊aidda.

²⁹ Napawe I'o manaile, i mangitou nata'utta; napawe I'o manganu sasangngone, i mangitou mate, wuṛṛu mawelengnga mabbal᷊i awu ere paarorone.

³⁰ Arawe napawe I'o mangonggolu sasangngo, i mangitou olaanna; I'o nangonggolu wiakka wakku su runia.

³¹ Antimanna awawantugu Mawu matatana'a sarangkal᷊o'engnge! Antimanna i Tou mal᷊uassa ringannu al᷊awo'u riadian-Ne!

³² Ito na'ellega runia wuṛṛu naola'a mangngindo, manga wowone nieṛṛetan-Ne, na'oman sara timbulle sinumabbangnga.

³³ I ya'u maapulu mangantari maddalo Mawu su al᷊o'engngu pabbiaṛṛangku, mangngantarin daralo su Ruata'u tantal᷊anna i ya'u ta'e wiakka.

³⁴ Antimanna aantari'u maal᷊uassa naung-Nge, ana waugu ete i Tou naaola'a naungku lullala'a.

³⁵ Wala'e taumata marosa mawul᷊i wuassu wowon dunia, wala'e taumata lal᷊eo masue mate. Paddalote Mawu, ei niawa'u! Paddalote Mawu!