DARALO 101 - WUKE SUSI WATTI'U AL᷊AL᷊USASSA

Paairen sangkatou ratu

¹ Daralon Daud. I ya'u maapulu mangngantari su ola'u apapia wuṛṛu atatul᷊idda, Si'o, oh Mawu, aantari daralo'u!

² I ya'u maapulu mattanno ola'u wiakka apan tawe sal᷊ane. Tingngerate I'o rumanta ringangku? I ya'u maapulu mabbiakka susi su wal᷊enu,

³ al᷊al᷊eo tawe ta'u iwala. Ta'u ipaddantinna pallal᷊aghun taumata apekka, wuṛṛu maddirite masasangkapia mangitou.

⁴ I ya'u maddiri inolaanna mallinga wuṛṛu maddiri mawol᷊engnga sulal᷊ummu al᷊al᷊eo.

⁵ Taumata apan mangngal᷊uandaga ringannu mal᷊annabba, sarun ta'u pateanna. Taumata apan mawunga wuṛṛu naungnge matanggakka tawe ta'u iwala aroddi.

⁶ Apulu'u taumata apan matuṛṛutta Mawu; i mangitou wotongnge matana'a su wal᷊e'u. Taumata mabbiakka apan tawe angngone wotongnge mangimbe si ya'u.

⁷ Taṛṛa wahia tawe wotongnge matana'a su wal᷊e'u; taṛṛa awusu tawe maataṛṛangnga su saruangku.

⁸ Miallo-miallo i ya'u sarun manginsue manga taumata lal᷊eo su wanua indi. Manga taumata apan ma'ola'a al᷊al᷊eo sarun ta'u limbuaṛṛanna wuassu soan Mawu.