DANIEL 7 - WUKE SUSI WATTI'U AL᷊AL᷊USASSA

I DANIEL NABATTI'U MANGA SONDAMME 7:1–12:13 Sondappi Daniel su ola'u appatta winatangnga

^1-2 Surabbi sambau, su tonna paarorone Belsyazar naola'a ratu su Babel, i ya'u, Daniel nabbal᷊iawa wuṛṛu naasomba sondappa. Wal᷊iawa udde ta'u niwoṛṛetta wuṛṛu wawal᷊o su ola'u sonda'u ere manansunna indi: Anginna ma'ikkatta nattiuppa wuassu al᷊awo'u pappi'uanne wuṛṛu pangillul᷊eanne tandi'a wahewalla su tahal᷊oangnga.

³ Udde nilumapputa wuassu lal᷊ummu ua'e iapa sambau uapapaṛṛala ringannu waine.

⁴ Iapa paarorone lihidde ere singa, erawe i tou uatahuanna papaiddu manu'a garuda. Sutempo i ya'u ma'ellega si tou, inaṛṛombanganne papaidde nasawutta wuṛṛu napallossa; i tou nawengketta wuassu leta'a wuṛṛu niaparisikka su leddane ruan ba'a ere taumata wua'udde nionggol᷊annu ringiddu taumata.

⁵ Winatangnga aruane lihidde ere beruangnga. I tou uarisikka su ledda ne su liudde, wuṛṛu uaapiddu tallun paddi duṛṛin rusu'a suwallattu manga isine. I ya'u naaringikka tingikka nabbisara si tou, “Otte, inasse ṛemessa anambone suapawe ipaapulunu!”

⁶ Sutempo i ya'u tantal᷊anna manuntukka, nilumapputte winatangnga apan waine. Lihidde ere macan tutul, arawe su liudde pia appata papaiddu manu'u winalanganna, wuṛṛu puane appatta. I tou aellehanne masaṛṛaungnga.

⁷ Sutempo tantal᷊anna i ya'u ma'ellega si tou, winatangnga aiappanne nilumapputa. I tou tumaniten matohassa wuṛṛu wahewalla see maata'utta. Ringannu manga isine apan masallakka wuṛṛu wahewalla see maata'utta. Ringannu manga isine apan masallakka wuṛṛu ere aattiku atta'a, i tou nakkimunsa'a wuṛṛu niuminassa wiakke, ana see mangke naṛṛinda manga lambene. Uapapaṛṛalan ringannu manga winatangnga dorone i tou uatahuana tandu'a mapul᷊o.

⁸ Tantal᷊anna i ya'u mannutukka manga tandungnge, inaṛṛombanganne sambau tandu'a waine tinumuwo suwallanne. Tandu'a udde addio'a, arawe wotongnge manesse'a wuṛṛu manawutta tallun bua suwallattu manga tandu'a paarorone udde. Tandu'a addio'a udde pia matane ere taumata wuṛṛu moṛṛongnga apan mattal᷊imoṛṛonganna ringannu mawunga.

Sondappa su ola'i Tou apan mabbiakka saran mal᷊annu-l᷊annu

⁹ Tantal᷊anna i ya'u sidutu mannutukka, manga pira adderan araratuanna tantal᷊anna iaaddo. Ana see i Tou apan wiakka saran mal᷊annu-l᷊annu ua'ianna su wowon wallattu sambau wuassu manga adderan araratuanna udde. Laung-Nge wuṛṛu utang-Nge mawira ere sangarenna. Adderan araratuan-Ne ringannu manga bolane lukkenggamma ana waugu renggammu putungnga,

¹⁰ wuṛṛu putungnga manggelekka wuassu adderan araratuanna. Su riwune taumata mangngimbe si Tou, wuṛṛu su jutane taumata uarisikka su saruan-Ne. Wua'udde nitattakke ammul᷊annu pallaṛṛuungnga, wuṛṛu buke niwu'ate.

¹¹ Sutempo i ya'u tantal᷊anna ma'ellega, i ya'u lai ta'e maaringikka tandu'a addio'a udde mattal᷊imoṛṛonganna ringannu warabungane. Wua'udde winatangnga aiappanne udde nipate, wuṛṛu winal᷊unanne nilombo sulal᷊ummu putungnga na'oman sara nonossa.

¹² Manga winatangnga apan waine buatte nisawutta taṛṛinone, arawe i mangitou niwala mabbiakka maddatingngu tempo apan buatte nitantunna.

¹³ Sulal᷊ummu sonda'u rabbi udde, i ya'u naasilo sambau lihidde ere taumata. I Tou nirumanta ringanni papal᷊iwutannu winabbawa ana see inaite ringannu Tou apan wiakka saran mal᷊annu-l᷊annu wuṛṛu niapasingkatta si tou.

¹⁴ I tou nionggol᷊annu aaddata wuṛṛu taṛṛino ere sangkatou ratu, na'oman sara manga taumata wuassu al᷊awo'u walahanna, ṛuangannu walahanna wuṛṛu wahasa mattaṛṛamawu si tou. Taṛṛinone sarun mattaṛṛangnga saran mal᷊annu-l᷊annu, pamamarentane tawe iawaddo.

Manga sondappa udde nital᷊a'a

¹⁵ Manga sondappa apan ta'u niasiloanna udde maawingo wuṛṛu maasinggawangnga naungku.

¹⁶ Wua'udde nangundanin suwallattu sangkatou apan uarisikka poiaroddi wuṛṛu i ya'u naddorongnga tal᷊aane su ola'u sarangkanambone udde. Ne i tou lai namasingkattu udde.

¹⁷ I tou nabbisara, “Appata winatangnga apan wahewalla udde eteudde appata araratuanna apan sarun lumapputa su runia.

¹⁸ Arawe umattu Ruata Apan Atanggaṛṛanne sarun manengkamma manara ipamarenta wuṛṛu pamamarentane sarun mattaṛṛangnga saran mal᷊annu-l᷊annu.”

¹⁹ Wua'udde i ya'u maapulu maasingkatta atappasannu winatangnga apan aiappanne udde, apan uapapaṛṛala ringanni ngana'a waine; apan aroddi maata'utta wuṛṛu apan makkimunsa'a wuṛṛu niuminassa sinangngone ringannu anu'une witu'a wuṛṛu isine atta'a, see mangke naṛṛinda manga lambene.

²⁰ I ya'u maapulu lai maasingkatta su ola'u mapul᷊o tanndu'a su puane wuṛṛu su ola'u tandu'a addio'a apan tinumuwo sal᷊immurine ana see nanawutta tallun bua wuassu manga tandu'a apan paarorone udde. Tandu'a addio'a udde pia matane wuṛṛu moṛṛongnga apan mattal᷊imoṛṛonggannu ringanu mawunga. I tou lembon maata'utta wuassu manga tanda'u apan waine udde.

²¹ Sutempo i ya'u mannutukka tandu'a udde, tandu'a udde uapapangalo mando'appa umattu Ruata wuṛṛu namaddon mangitou.

²² Wua'udde i Tou apan mabbiakka saran mal᷊annu-l᷊annu udde nirumanta see nangongollu inappuanne apan napaaṛṛinon umattu Ruata Apan Atanggaṛṛanne. Tempone nia'omante i mangitou manengkamma taṛṛino ipamarenta.

²³ Ete indi tal᷊aane apan ta'u niasombanganna, “Winatangnga aiappanne udde eteudde araratuanna aiappanne apan sarun dumarisikka su ruania wuṛṛu sarun mapapaṛṛala ringannu manga araratuanna waine. Araratuanna udde sarun makkimunsa'a wuṛṛu mangalluppa ahewallu runia wuṛṛu maṛṛinda manga lambene.

²⁴ Su mapul᷊o tandu'a udde eteudde siri mapul᷊o ratu apan sarun mamarenta araratuanna udde. Wua'udde sangkatou ratu apan waine sarun dumanta; i tou sarun uapapaṛṛala atonna ringannu manga ratu apan paarororne, wuṛṛu i tou sarun mamaddon siri tallu ratu.

²⁵ I tou sarun mabbisara lumawangnga Ruata Apan Atanggaṛṛanne wuṛṛu mangallangnga umattu Ruata, wuṛṛu i mangitou sarunaggasanne al᷊annune tatallu setenga su tonnane.

²⁶ Ana see mallaṛṛuungngu surga sarun maammulla wuṛṛu manawutta taṛṛinone see makkimunsa'a su si tou ma'oman sara masue.

²⁷ Taṛṛino wuṛṛu awawantugu al᷊awo'u araratuanna su runia sarun ionggolla su umattu Ruatu Apan Atanggaṛṛanne. Taṛṛinon mangitou ipamarenta tawe panguddusanne wuṛṛu anambon tembonanne su runia sarun mattaṛṛamawu si mangitou ringannu matuṛṛutta.”

²⁸ Nattaalle isindi watti'a indi. I ya'u lembon sussinggawangnga na'oman sara nabbal᷊i namikkassa, arawe tawe saran sangkatou apan tau niwal᷊oanna su ola'u sarangkanambone udde.