DANIEL 6 - WUKE SUSI WATTI'U AL᷊AL᷊USASSA

I Daniel nitaṛṛo sulal᷊ummu liangngu singa

¹ Napawe Belsyazar natete niapate, Darius taumatan Media nangaṛṛo adderan araratuanna. Sutempo udde uukki tou annumu pul᷊o dua su tonnane.

² Darius nattahia araratuanne naola'a maṛṛasutta daruan pul᷊o propinsi apan sambau-sambau paparentannu sangkatou gubernure.

³ Daniel wuṛṛu ruan katou waine nitenegu manga gubernure udde tadea'u ratu tawe arugianna.

⁴ Tawe nal᷊annu inauranna manaran Daniel lembon mappianne wuassu manaran manga gubernure wuṛṛu manga mandariaga waine. Ana waugu udde, ratu mappalu manenegi Daniel moala'a tembonanne su ahewallu araratuanna.

⁵ Arawe manga gubernure wuṛṛu manga mandariaga udde mattinsahadda maddea'a manga pasasal᷊an Daniel sulal᷊ummu manaran papamarenta, arawe i mangitou tawe naasomba, ana waugu Daniel satia wuṛṛu matul᷊idda see tawe ma'ola'a pasasal᷊a ara'e sal᷊a manga waine.

⁶ Ana see i mangitou nabbisara, “I ite tumba'u wotongnge maasomba pasasal᷊an Daniel sulal᷊ummu olangnge ringannu agamane.”

⁷ Wua'udde i mangitou inaite suadio'a sinumaruanna ratu wuṛṛu nabbisara, “Oh Tuangku Ratu Darius, wiakke Tuangku saran mal᷊annu-l᷊annu!

⁸ I yami sarangkanambone apan mallu'adda araratuanni Tuangku, mawae manga mandariaga, manga gubernure wuṛṛu manga tembonanne waine, buatte nabbaidda maddorongnga tadea'u Tuangku mapasabbangngu suratta parenta apan ṛinone tattuṛṛutanna ringannu atonna-tonna. Ṛinone Tuangku mamarenta tadea'u su al᷊annunne tallun pul᷊o su allone tawe saran sangkatou iwala mangapiddu darorongnga suwallattu sambau monganna ara'e taumata, tabbene'e si Tuangku sassane. Isai-sai apan nilumawangnga parenta udde sarun itaṛṛo sulal᷊ummu loṛṛangngu singa.

⁹ I yami sumal᷊ande tadea'u Tuangku mabartanda suratta parenta udde tadea'u maola'a atoranna su Media wuṛṛu Persia apan tate iaul᷊e apia.”

¹⁰ Ne Ratu Darius nabartandate suratta parenta udde.

¹¹ Napawe i Daniel naaringikka olangnge udde, i tou mapul᷊ete su wal᷊ene. Wabbo'ane apan rengkenne al᷊iu rosone pia manga jandela apan uasaruanna watukku Yerusalem. Wuṛṛu ere su inanaramanne, i tou u'al᷊iomanna su Ruatane wuṛṛu maddalo Mawu paatallu allo massallo ringannu u'al᷊intudda su saruannu manga jandela apan wawu'anna udde.

¹² Sutempo manga seetti Daniel naasilo si Daniel tantal᷊anna u'aliomanna su Ruatane,

¹³ i mangitou sarangkanambone inaite sinumaruanna ratu mangalaen Daniel. I mangitou nabbisara, “Wal᷊inewe Tuangku buatte nabbartanda suratta parenta apan manningaddu anambon taumata al᷊anannune tallun pul᷊o su allone indi mamasingkattu darorongnge suwallatu sambau monganna ara'e taumata tabbene'e si Tuangnga sassane? Wuṛṛu lai, mangungku isai-sai nilumawangnga parenta udde sarun itaṛṛo sulal᷊ummu liangngu singa?” Ratu sinumbimbakka, “Atonna, wuṛṛu parenta udde naola'a atoranna su Media wuṛṛu Persia apan tawe wotongnge ia'ule apia.”

¹⁴ Ana see unni mangitou su ratu, “Daniel, sangkatou apan niwuangnga wuassu Yehuda, tawe naddaringikka si Tuangku wuṛṛu mangngaddio'a parentan Tuangku. I tou u'al᷊iomanna ringannu uaatokka paatallu allo massallo.”

¹⁵ Naaringikka udde ratu nabbal᷊i massusa wuṛṛu sussinggawangnga, na'oman sara i tou naddea'a ringidda tadea'u manal᷊amatta si Daniel. Naddatingngu wawallone lai ratu ta'e maṛṛingidda.

¹⁶ Wua'udde manga taumata udde nabbelengnga apa sinumaṛṛuanna ratu wuṛṛu nabbisara, “Tuangku, rinone Tuangku mannaungnga manungku tumuṛṛuttu atoranna su Media wuṛṛu Persia, parenta apan niapasabbangngu ratu tate wotongnge iawal᷊u.”

¹⁷ Ne panginsueanne ratu namarenta tadea'u Daniel sametanna wuṛṛu itaṛṛo sul᷊al᷊um muliangngu singa. Ratu nabbisara si Daniel, “Antimanna Ruatanu apan sassubbannu ringannu satia udde manal᷊amatta si'o.”

¹⁸ Wua'udde sambau watu wahewalla nipanappinga moṛṛongngu liangnga udde, wuṛṛu ratu nangarussa watu udde ringannu arussan araratuanna wuṛṛu arussan manga tembonanne, na'oman tawe saran sangkatou lai apan wotongnge mamallossi Daniel wuassu manga singa udde.

¹⁹ Wua'udde napul᷊ete ratu watukku wal᷊en araratuanna. I tou maddiri umanna ara'e lai limbatanna. Wuṛṛu suapan ṛabi udde i tou tawe maatiilla.

²⁰ Sutempo wawallo ratu napu'ote wuṛṛu inaite ringannu nasasaṛṛawutta watukku liangngu singa.

²¹ Napawe na'omate poiaroddi, i tou nangintul᷊ite ringannu tingikka sussinggawangnga, “Daniel, allangngu Ruata apan wiakka! Apa Ruatanu apan sassubbannu ringannu satia udde wotongnge manal᷊amatta si'o wuassu manga singa udde?”

²² Ana see niaringiṛṛante tingikki Daniel apan sinumimbakka, “Wiakke Tuangku saran mal᷊annu-l᷊annu!

²³ Ruatan allangnga buatte nandolokku mala'ekan-Ne niapasappingnga moṛṛongngu manga singa udde na'oman sara i mangitou tawe na'ola'a apa-apa su allangnga. Ruata nanal᷊amatta allangnga ana waugu i Tou masingkatta manungku allangnga tawe na'ola'a pasasal᷊a su saruan-Ne wuṛṛu su saruanni Tuangku.”

²⁴ Tawe hampa al᷊al᷊uassu naungngu ratu wuṛṛu i tou namarenta tadea'u Daniel iapasabbangnga wuassu liangnga udde. Napawe parenta udde niapaamatta, inauanna manungku tawe niasombanganna lessa saran addio'a si Daniel, ana waugu i tou mangngimanna Ruatane.

²⁵ Wua'udde ratu namarenta taumata tadea'u iapasametta manga taumata apan buatte mangalaen Daniel. Wua'udde i mangitou suadio'a ringannu manga anangnge wuṛṛu manga awingngi mangitou nitaṛṛo sulal᷊ummu liangngu singa udde. Taambe lai i mangitou na'oma su lal᷊ummu liangnga udde, manga singa udde buatte tinumambo si mangitou wuṛṛu naṛṛimunsa'a manga duṛṛin mangitou.

²⁶ Wua'udde Ratu Darius nangirimmu suratta su manga taumata suassu al᷊awo'u walahanna, ṛuangannu walahanna wuṛṛu wahasa su ahewallu runia, “Tabbean paddarame!

²⁷ I ya'u mamarenta su anambon taumata apan uatana'a su wageangngu araratuangku tadea'u mata'utta wuṛṛu mangaddatta Ruata apan sassubbanni Daniel! I Tou uddewe Ruata apan wiakka saran mal᷊annu-l᷊annu, maddatingngu pangudusannu runia i Tou uaparenta. Araratuan-Ne tawe mariaddi mate. Taṛṛino-Ne mangke tawe masue.

²⁸ I tou manal᷊amatta wuṛṛu mammallossa ma'ola'a tanda maaherangnga wuṛṛu maatiangnga su langitta aroddi lai su runia. Daniel buatte niapasal᷊aman-Ne, wuassu moṛṛongngu manga singa.”

²⁹ Etearoddi i Daniel sidutu uaagassa manara apan atanggaṛṛanne su al᷊o'engngu pammarentan Darius wuṛṛu pamamarenta Koresh, taumatan Persia udde.