DANIEL 5 - WUKE SUSI WATTI'U AL᷊AL᷊USASSA

Ratu Belsyazar ana'i Nebukadnezar na'ola'a andeangnga

¹ Su allo sambau Ratu Belsyazar nannote saṛṛiwu su atoune manga tembaonanne rumanta su andeangnge apan apianne, wuṛṛu ma'inumma anggore.

² Tantal᷊anna i mangitou ma'inumma, Belsyazar namarenta iapaanu manga mangko wul᷊awanna wuṛṛu sal᷊a'a apan buatte niaṛṛon Nebukadnezar, iamangnge, wuasu lal᷊ummu Wal᷊en Mawu su Yerusalem. Pandumanni Ratu Belsyazar eteudde tadea'u manga tembonanne, manga awingnge, wuṛṛu manga nia'ine wuṛṛu i tou sassane, ma'inumma su manga mangko udde.

³ Ne niapidde manga mangko udde si tou, see i mangitou sarangkanambone na'inumma anggore wuasu manga saranapa udde.

⁴ Lapiddu ma'inumma i mangitou mangke maddalo manga monganna apan niola'a wuasu wul᷊awanna, sal᷊a'a, witu'a alu wuṛṛu watu.

⁵ Inaṛṛombanganne niasiloanna ta'iakku taumata apan mammoṛṛettu sambau wisara su darandungngu wal᷊en araratuanna su tampa apan asenaṛṛanne aatarangannu semaku sol᷊o na'oman sara ratu wotongnge maasilo ringannu matualaga.

⁶ I tou nabal᷊i namillossa wuṛṛu arodi ata'unne na'oman sara wuune mangngiladda.

⁷ Ringannu mangngintul᷊i i tou maddorongnga tadea'u manga taṛṛa si'atta, taṛṛa ṛopa wuṛṛu mapapaden anumpitanna waggoanna. Sutempo i mangitou nirumanta, ratu nabbisara, “Isai-sai wotongnge maawasan woṛṛetta udde wuṛṛu mamasingkattu atappasanne si ya'u, sarun ta'u onggol᷊annu laubba araratuangku juba ungu wuṛṛu wual᷊awanna tatialan aadatta. Wal᷊ine wua'udde lai i tou sarun ta'u itenega maola'a tembonannu atallune sul᷊ummu araratuangku.”

⁸ Manga mapapande inaite, arawe tawe saran sangkatou wussai mangitou wotongnge maawasan woṛṛetta udde ara'e mamasingkatta atappasanne su ratu.

⁹ Ratu Belsyazar lembon sussinggawangnga wuṛṛu namillossa lai; see lai manga tembonanne lembon nabbingote.

¹⁰ Naaringikka manga aintul᷊in datu wuṛṛu manga tembonanne, inangngu ratu sinumutta salal᷊ummu tampan aneangnga. Ana see i tou nabbisara, “Nabbiakke Tuangku saran mal᷊annu-l᷊annu! Paatammudde naungngi Tuangku wuṛṛu ariette mamikkassa.

¹¹ Ana waugu sulal᷊ummu araratuanni Tuangku pia sangkatou esakka apan aintaṛṛoannu ghaṛṛahon manga monganna apan susi. Sutempo pamamarentan iamangngi Tuangku, taumata udde niatialanna uatahuanna asingkata, pasasunna wuṛṛu apande, apan ere apandean manga monganna. Iamangngi Tuangku Ratu Nebukadnezar buatte nanenegi tou naola'a piaṛṛa'u manga mapapanden taṛṛa si'atta, taṛṛa ṛopa, wuṛṛu manga taumata pia asingkanne wuṛṛu mapapanden anumpitanna.

¹² I tou tumaniten pande wuṛṛu masingkatta see pande sulal᷊ummu mannal᷊a'an wal᷊iawa, mamasingkattu addappingnga wuṛṛu mani'attu aiwal᷊o apan masahadda. Arenne i Daniel, arawe ratu nanagone Beltsazar. Waggoite i tou. I tou sarun mamasingkatta si Tuangku apa atappasannu woṛṛetta indi.”

I Daniel nanal᷊a'a atappasannu woṛṛetta udde

¹³ Ringanni mal᷊ihakka Daniel niapadda sinumaruanna ratu. Ana see ratu naiwal᷊ote si tou, “Ete i'o Daniel, taumatan Yahudi niwuangnga, apan buatte niapiddu iamangku wuassu leta'u Yehuda?

¹⁴ I ya'u naaringikka, manungku i'o niintaṛṛoannu ghaṛṛahom mongana apan susi, wuṛṛu manungku i'o pia asingkatta, pasasunna, wuṛṛu apande apan lembon wahewalla.

¹⁵ Manga mapapande wuṛṛu manga taṛṛa si'atta buatte naannamma mabbasan woṛṛetta indi wuṛṛu mamasingkattu atappasanne si ya'u. Arawe i mangitou tawe maawal᷊o.

¹⁶ Wakkute ta'u niaringiṛṛanna manungku i'o wotongnge maasi'attu al᷊awo'u andeangnga wuṛṛu mamasuingkattu manga hatto apan masahadda. Amungkangngu i'o wotongnge maawasan woṛṛetta indi wuṛṛu mamasingkattu atappasanne si ya'u sarun ta'u onggol᷊annu laubbu araratuanna juba ungu wuṛṛu wul᷊awanna tialan aaddatta. Wal᷊ine wua'udde lai i'o sarun ta'u itenega maola'a tembonanne atallune sulal᷊ummu araratuangku.”

¹⁷ Daniel sinumimbakka, “Tuangku salaiwe tawe mangonggollu aonggolla udde si ya'u, onggol᷊a'e su taumata waine. I ya'u sarun mabbasan woṛṛetta udde si Tuangku wuṛṛu mamasingkattu atappasanne.

¹⁸ Ruata Apan Atanggaṛṛanne na'ola'a si Nebukadnezar, Iamangngi Tuangku nabbal᷊i ratu mawantuga wuṛṛu nangonggolla si tou ahahewalla wuṛṛu atatelengnga.

¹⁹ I tou aroddi ahewalle, na'oman sara manga taumata wuassu al᷊awo'u walahanna, ṛuanganu walahanna, wuṛṛu wahasa, mangngiladda wuṛṛu matta'utti tou. Amungkangngu i tou mappulu manal᷊amatta sangkatou taumata, i tou mangke manal᷊amatta taumata udde. I tou mapatanggakka wuṛṛu mapaawawon sai-sai tumuṛṛuttu apulune.

²⁰ Arawe sutempo i tou nabbal᷊i mawunga, tawe maddaringikka wuṛṛu maṛṛagissa, i tou niema'a wuassu adderan araratuanne na'oman sara i tou niawul᷊iannu awawantuge.

²¹ I tou nilimbuaṛṛanna wuassu ammul᷊annu tumana'u soa wuṛṛu ṛingiranne naola'a ere ṛingirannu winatangnga. I tou mabbiakka ringannu keledain ahuranganna, u'anna nannal᷊o ere sapi wuṛṛu mattiilla su wadda'a na'oman sara maṛṛolo angngukka. Panginsueanne i tou nanga'u manungku Ruata Apan Atanggaṛṛanne uataṛṛino araratuannu taumata wuṛṛu araratuanna udde nionggollu Mawu sisai-sai apan nipile-Ne.

²² Arawe anangnge esakka, eteudde Tuangku sassane, maddiri mapaawawon watanganne, salaiwe Tuangku masingkattu sarangkanambone udde.

²³ Tuangku mammungan batanganne su saruannu Mawu su surga wuṛṛu waṛṛani mandolokka mangapiddu manga mangko apan buatte niaṛṛo wuassu Wal᷊en Mawu. Ana see Tuangku wuṛṛu manga tembonanne, manga awingnga wuṛṛu manga nia'in Tuangku na'inumma wuassu manga mangko wul᷊awanna, sal᷊a'a, witu'a atta'a, alu wuṛṛu watu, manga monganna apan tawe maasilo ara'e maaringikka ara'e tawe maasunna. Tuangku tawe mangaddatta Ruata apan mannantunnu pabbiarṛṛanna wuṛṛu papaten tuangku manantunnu amatannu pabiaṛṛanni Tuangku.

²⁴ Ana wauga udde Ruata nandolokku ta'iakka niapawoṛṛettu tanata-Ne.

²⁵ Eteindi woṛṛette udde, ‘Ireengnga, ireengnga, itimbangnga, tahianna.’

²⁶ Wuṛṛu eteindi atappasanne: Ireengnga tempon pamamarentan Tuangku buatte nireengngu Ruata wuṛṛu niinsuene;

²⁷ nitimbangnga, Tuangku buatte nitimbangnga wuṛṛu niasangkal᷊anna tawe maasiddore;

²⁸ nitahia, araratuanni Tuangku tahianna wuṛṛu ionggolla su taumatan Media wuṛṛu Persia.”

²⁹ Ringannu mal᷊ihakka Belsyazar namarenta manga mamanarane tadea'u malluṛṛe si Daniel juba ungu wuṛṛu mangelen wul᷊ele wul᷊awanna su ullakkane. Wua'udde i tou nanenegi Daniel naola'a tembonanne atallune salul᷊ummu araratanne.

³⁰ Su rabbi udde lai nippatete Belsyazar ratun Babel udde.