DANIEL 4 - WUKE SUSI WATTI'U AL᷊AL᷊USASSA

I Nebukadnezar nabbal᷊iawa su aruane

¹ Eteindi papasingkati Ratu Nebukadnezar apan niiringnge su manga taumata wuassu al᷊awo'u walahanna, ṛuangannu walahanna wuṛṛu wahasa su ahewallu runia: “Tabbean paddarame!

² I ya'u mappulu mabbatti'u ola'u al᷊aṛṛindu'a wuṛṛu tiala maatiangnga apan buatte niola'u Ruata Apan atanggaṛṛanne si ya'u.

³ Tumaniten bahewalla atatiangnga apan niolang-Nge! Tumaniten bahewalla al᷊aṛṛindu'a apan niolang-Nge! Ruata sarun maola'a ratu sarangkal᷊o'engnge. I Tou uataṛṛino su al᷊o'engngu tempo.”

⁴ I ya'u uatana'a ringannu paddarame sulal᷊ummu wal᷊en araratuangku wuṛṛu mabbiakka ringannu nasuungnga.

⁵ Arawe su sambau rabbi sutempo i ya'u tantal᷊anna mattiilla, i ya'u nabbal᷊iawa wuṛṛu naasomba sambau sondappa apan lembon maasinggawangnga naungku.

⁶ Ana see niwagoangku manga mapapande apan uatana'a su Babel iapatal᷊a'a si ya'u atappasannu wal᷊iawa udde.

⁷ Arawe sutempo manga taṛṛa si'atta, taṛṛa ropa, manga taumata pia asingkanne wuṛṛu mapapanden anumpitanna udde nirumanta wuṛṛu ta'u niwatti'a wal᷊iawa'u udde si mangitou, tawe saran sangkatou apan wontongnge manal᷊a'an atappasanne.

⁸ Panginsueanne nirumantate i Daniel apan isassaggo lai Beltsazar ere lai arannu mongangku. Daniel niintaṛṛoannu ghaṛṛahon manga mongangku apan susi. Ta'u niwatti'a wal᷊iawa'u lai si tou, wisara'u,

⁹ “Ei, Beltsazar, piaṛṛa'u manga taumata pia asingkanne, i ya'u masingkatta manungku i'o niintaṛṛoannu ghaṛṛahon manga monganna apan susi, na'oman sara tawe addappingnga apan uawuni si'o. Paddaringikke wal᷊iawa'u indi, wuṛṛu tal᷊aa'e atappasanne.

¹⁰ Sutempo i ya'u tantalanna mattiilla, i ya'u naasilo sambau aaluanna apan tinumuwo su pattangngannu runia.

¹¹ Aaluanna udde lembon matanggakka; alune masallakka wuṛṛu matohassa. Puidde naddatingngu langitta, naoman sara wotongnge ellehannu anambon taumata su runia.

¹² Manga rongngane nangelomma wuṛṛu wuane mangke nabbelle'a, mattiudda annanannu anambon tumana'a su ahewallu runia. Manga winatangnga matengnga ual᷊lowangnga su al᷊ungnge wuṛṛu manga manu'u winalanganna massal᷊akka su manga rananne. Wuṛṛu al᷊awo'u riaddianna mabbiakka wotongnge umanna wuane.

¹³ Sutempo i ya'u tantalanna maṛṛingiddu sondappa udde, i ya'u naasilo sangkatou mala'ekatta wuassu surga; i tou aellehanna uasaddia wuṛṛu uatehamma.

¹⁴ Ringannu tingikka ma'ikkatta i tou nabbisara, ‘Tuwangke alu udde wuṛṛu tontote manga rannane, tontonga'e manga rongngane wuṛṛu sal᷊iawuṛṛa'e manga wuane. Limbuaṛṛete manga winatangnga apan ual᷊allowangnga su al᷊ungnge wuṛṛu manga manu'u winalanganna apan massal᷊akka su manga rannane.

¹⁵ Arawe wala'e tuidde matantangnga sulal᷊ummu leta'a. Wa'isse ringannu ṛate atta'a wuṛṛu witu'a wua'udde tantanga'e su wadda'u nanal᷊o. Wala'e i tou maṛṛolon anggukka, wuṛṛu mabbiakka suadio'a ringannu manga winatangnga see lai manga sasuanna.

¹⁶ Wala'e ṛingiddu taumatane mawal᷊u mabbal᷊i ringiddu winatangnga al᷊annune pitu tonna.

¹⁷ Eteudde inaappuanni yami manga mala'ekatta apan uasaddia wuṛṛu uatehamma. Pandumannu Ruata Apan Atanggaṛṛanne uataṛṛino araratuannu taumata wuṛṛu i Tou apan nangonggollu araratuanna udde su anambon taumata apan nipile-Ne, ewe'e lai su taumata apan tawe gunane saran addio'a.’

¹⁸ Ei Beltsazar, eteudde wal᷊iawa'u. Orassa indi pasingkata'e si ya'u atappasanne. Tawe saran sangkatou wuassu manga mapapande apan uatana'a su araratuangku wotongnge mamasingkatta si ya'u, arawe i'o wotongnge, ana waugu i'o niintaṛṛoannu ghaṛṛahon manga monganna apan susi.”

I Daniel nanala'an atappasannu wal᷊iawa udde

¹⁹ Naaringikka udde, Daniel apan isassaggo lai Beltsazar, niṛṛumindu'a wuṛṛu tinumiangnga manga piran katempo. Ne i ya'u Ratu Nebukadnezar nabbisara si tou, “Beltsazar, ariete i'o suminggawangnga ana waugu wal᷊iawa wuṛṛu atappasanne udde.” Beltsazar sinumimbikka, “ Tuangku, apiawe eteapa unnuwisara manga arariadiana apan iraṛṛangngon wal᷊iwa udde naṛṛi'a su manga seetti Tuangku wuṛṛu wal᷊ine Tuangku.

²⁰ Punnu alu apan aellehanni Tuangku aroddi atanggakke, ao'oman sara puidde naddatingngu langitta, wuṛṛu wotongnge ellehannu anambon taumata su runia.

²¹ Manga rongnganne nangelomma wuṛṛu wuane nabbele'a na'oman sara wotongnge mattiuda iapaanna su anambon tumana'u runia. Manga winatangnga matengnga lullallowangnga su al᷊ungnge, wuṛṛu manga manu'u winalanganna massal᷊akka su manga rannane.

²² Oh Tuangku, ete i Tuangku punnu alu apan matanggakka wuṛṛu matohassa udde. Awawantugi Tuangku aatambanna maddatingngu langitta wuṛṛu taṛṛinon Tuangku aatambanna sara pentakku runia.

²³ Tuangku naasilo lai sangkatou mala'ekatta nonto'a wuassu surga lapiddu nabbisara, ‘Tuwangke alu indi wuṛṛu rimunsa'e, arawe wala'e tuide matantangnga sulal᷊ummu leta'a. Wa'isse ringannu ṛate atta'a wuṛṛu witu'a wua'udde tantangnga'e su wadda'u nannal᷊o. Wale'e i tou maṛṛolon anggukka wuṛṛu mabbiakka suadio'a ringanna manga winatangnga al᷊annune pitu tonna.’

²⁴ Tuangku, eteindi atappasannu sondapa udde, wuṛṛu eteindi apan niṛṛawessu Ruata Apan Atanggaṛṛanne su ola'i Tuangku sassane.

²⁵ Tuangku sarun limbuaṛṛanna wuassu ammul᷊annu tumana'u soa wuṛṛu mabbiakka sutangngan manga winatangnga su wadda'a. Al᷊annune pitu tonna Tuangku sarun umanna nanal᷊o ere sapi wuṛṛu mattiilla su lete'a mal᷊al᷊angnga, ma'oman sara maṛṛolon anggukka. Wua'udde Tuangku darun manga'u manungku Ruata Apan Atanggaṛṛanne uataṛṛino su aṛṛatuannu taumata, wuṛṛu araratuanna udde nionggollu Ruata su anambon taumata apan nipile-Ne.

²⁶ Manga mala'ekatta namarenta tadea'u tuiddu alu udde iwala matantangnga sulal᷊ummu leta'a. Udde atappasanne manungku sarun maola'a ratu apia napawe Tuangku buatte nanga'u manungku Ruata uataṛṛino ahewallu runia.

²⁷ Ana waugu udde rinone Tuangku maddaringikka tatantiron allangnga. Ariete Tuangku ma'ola'a rosa apia, arawe pa'ola'a inolaanna apan mapia wuṛṛu matul᷊idda, wuṛṛu aakkanten taumata asiangnga. Ringannu aroddi Tuangku sidutu sarun su lal᷊ummanna'a.”

²⁸ Sarangkanambone udde sarun mariaddi su watangangku, Ratu Nebukadnezar.

²⁹ Mapul᷊o dua su wul᷊anna wua'udde, sutempo i ya'u u'amatta su wawail᷊anna al᷊iu rosone su wal᷊en araratuangku su Babel,

³⁰ i ya'u nabbisara, “Pa'ellege, apiawe eteapa soa Babel! Eta i ya'u apan na'ola'a nabbal᷊i inangngu araratuanna ipammasingkattu taṛṛino wuṛṛu atatoha'u, awawantuga wuṛṛu atatelengku!”

³¹ I ya'u taambe nuddussa mabbisara sutempo niaringiṛṛanna tingikka wuassu langitta, “Ratu Nebukadnezar, paddaringikke indi! Taṛṛinonu ere sangkatou langitta buatte nianu wuassi'o.

³² I'o sarun limbuaṛṛanna wuassu ammul᷊annu tumana'u soa, wuṛṛu mabbiakka manga winatangnga su wadda'a. Al᷊annune pitu tona i'o sarun umanna nannal᷊o ere sapi. Wua'udde i'o sarun manga'u manungku Ruata Apan Atanggaṛṛanne uataṛṛino su araratuannu taumata wuṛṛu araratuanna udde nionggollu Ruata su anambon taumata apan nipile-Ne.”

³³ Sutempo udde lai, manga wisara udde nabbal᷊i atonna. I ya'u, Nebukadnezar nilimbuaṛṛanna wuassu ammul᷊annu tumana'u soa wuṛṛu u'anna nannal᷊o ere sapi. Waddangku maṛṛolon angngukka, utangnge nabbal᷊i mal᷊o'engnga ere wambul᷊un asiaṛṛe, wuṛṛu anu'une ere aṛṛumain manu'u winalanganna.

I Nebukadnezar naddalo Ruata

³⁴ Napawe pitu tonna udde nal᷊iudde, i ya'u tinumingngara langitta, wua'udde nawelengke apia ringirangku. Ne i ya'u naddalote Ruata Apan Atanggaṛṛanne. Ta'u niraloanna wuṛṛu ta'u niwantuhanna i Tou apan mabbiakka saran mal᷊annu-l᷊annu udde. “Ruata sarun maola'a ratu saran mal᷊annu-l᷊annu. I Tou ataṛṛino su al᷊o'engngu tempo.

³⁵ Manga walahanna su runia tawe gunane. Ruata uataṛṛino mala'ekatta su surga wuṛṛu tumana'u runia. Tawe saran sangkatou apan maal᷊awangnga apulu-Ne, taweddu waṛṛani mamasingkattu apa apan niolang-Nge.”

³⁶ Sutempo ringirangku nawelengnga apia si ya'u, ne ahahewalla, awawantuga wuṛṛu atatelengngu araratuangku niapawelengnga apia si ya'u. I ya'u nisal᷊ohoannu mamanara'u wuṛṛu manga tembonannu araratuangku, wuṛṛu i ya'u niwelengnga apia su araratuangku, ewe'e lai awawantu'u nabbal᷊i maggewal᷊anna wuasu paarorone.

³⁷ Nariaddi orassa indi i ya'u, Nebukadnezar maddalo, mannanggakka wuṛṛu mammantuga Ratun Surga. Al᷊awo'u inolaan-Ne atonna wuṛṛu matul᷊idda wuṛṛu i Tou wotongnge mapaawawon taumata apan pallal᷊anune mawunga.