DANIEL 11 - WUKE SUSI WATTI'U AL᷊AL᷊USASSA

¹ Ete i tou apan nirolokka massumbala wuṛṛu manahe'u su tonna pamamarentan Darius taumatan Media udde.

² Wuṛṛu apa apan ta'u iwisara si'o udde atonna.” Mala'ekatta udde mabbisara, “Siri tallu ratu waine sarun mamarenta Persia, tatantalongannu ratu aiappanne apan sarun lembon aalanne wuasi ngana'a waine. Su panginsueannu taṛṛinone wuṛṛu awawantuge, i tou sarun masasaruannu atatohanne ringannu araratuannu Yunani.

Araratuannu Mesir wuṛṛu Araratuannu Siria

³ Wua'udde sarun dumanta sangkatou ratu apan matohassa. I tou sarun mamarenta araratuanna apan lembon wahewalla wuṛṛu walate i tou ma'ola'a apulun naungnge.

⁴ Arawe su panginsueannu awawantuge, araratuanna udde sarun mapesangnga mabbal᷊i appattu wageangnga. Manga ratu apan wal᷊ine papapulunne sarun mamarenta maola'a hahantine, wuṛṛu i mangitou tawe atatohassa ere i tou.

⁵ Ratun banua timukka sarun mabbal᷊i matohassa. Arawe sangkatou wuassu wallattu manga panglimane sarun mabbal᷊i lembon mattohasanna wuassi tou, wuṛṛu i tou sarun mamarenta araratuanna apan lembon ahewal᷊anne lai.

⁶ Manga pira tonna wua'udde ratun banua timukka sarun makkiinnu paa'aukka ringannu ratun banuan sawannakka wuṛṛu mangawingngu anangnge maṛṛuala ringannu ratun banuan sawannakka udde. Arawe paa'aukka udde tawe nattaṛṛangnga, wuṛṛu maṛṛuala udde sarun pateanna, aroddi lai awingnge wuṛṛu anangnge wuṛṛu manga allangnge apan buatte nanguntuddi mangitou.

⁷ Tawe nal᷊annu wua'udde, sangkatou apan sangkamonanna ringannu maṛṛuala udde sarun maola'a ratu. I tou sarun mamangalo tantaran banuan sawannakka, mamangalo tanda'a watune wuṛṛu mamaddone.

⁸ Sutempo udde i tou nabbelengnga watukku Mesir, i tou sarun mangapiddu paal᷊uannu mongannu seenne wuṛṛu saranapa wul᷊awanna wuṛṛu sal᷊a'a apan buatte nionggolla su monganna udde. Manga pira tonna al᷊annune i tou tate mamangalo ratun banua sawannakka.

⁹ Wua'udde ratun banua sawannakka sarun mamangalo wanua timukka, arawe i tou sarun iawado wuṛṛu mapul᷊e watukku wanuane sassane.

¹⁰ Ana see manga umasannu ratun banua sawannakka sarun mandiahite inai mapapangalo wuṛṛu mangammullu tantara apan wahewalla. Sangkatou suwallatti mangitou sarun inai mamangalo ere manawangnga.

¹¹ Ne ratun banua timukka nasa'ute, wuṛṛu i tou inaite su tampan papangaloanna mando'appa ratun banua sawannakka. I tou sarun mahessi mamaddon tantara apan manambo niapiddu ratun banua sawannakka.

¹² Wua'udde i tou sarun lumassa ana waugu auntunganne wuṛṛu ana waugu buatte namate manambo seetta, arawe i tou tawe sidutu uataṛṛino.

¹³ Su aruane lai ratun banua sawannakka sarun ma'ola'a tantara apan bahewalla wuassu paarorone. Napawe tempone nia'omante, i tou sarun inai ringannu tantara apan wahewalla wuṛṛu ahidde apan nasuungnga atonna.

¹⁴ Ne manambo taumata apan sarun mamangalo ratun banua timukka. Wuṛṛu manga pira taumata maṛṛagissa wuassu walahannu, Daniel, sarun mamangalo lai ana waugu i mangitou buatte naasilo sambau sondappa. Arawe i mangitou tawe naasomba.

¹⁵ Wua'udde ratun banua sawannakka sarun mamangalo sambau soa pia tanda'a watune wuṛṛu manga tantara apan nipilene lai tawe maaro'appa saran kaddio'a.

¹⁶ Ratun banua sawannakka udde sarun ma'ola'a walate apulun naungnge ringannu tawe naasomba tatompolla sarang kaddio'a. I tou lai sarun matana'a su leta'a apan maṛṛansangnga wuṛṛu anuanna abbi.

¹⁷ Wua'udde ratun banua sawannakka sarun mandiahi tantarane ipamangalo wanua timukka. Ana see ringannu pandumanna manganu ahewallu araratuannu seene, i tou sarun makkiinnu paaire ringanni i tou wuṛṛu mangawingu anangnge maṛṛualane ringannu ratun Mesir udde; arawe ṛiinne udde tawe gessine.

¹⁸ Napawe wua'udde i tou sarun mamangalo manga walahanna su apannu tahal᷊oangnga, wuṛṛu manambo apan niawaddone. Arawe sangkatou piaṛṛa'u wanua waine sarun mapaaddon lal᷊obbossa apan niolangnge udde, ewe'e lai sarun mabbal᷊issa lal᷊obbossa udde si tou.

¹⁹ Ratun banua sawannakka udde sarun mabbelengnga watukku manga tanda'a watune su wanuane sassane, arawe i tou sarun iawaddo wuṛṛu tate batti'a lai su ola'i tou.

²⁰ I tou sarun hantiannu sangkatou ratu apan mandolokku mamanarane apan maṛṛagissa iapaammullu wose ringannu iwata'a ipanamba paa'alan araratuanne. Sulal᷊ummu tempo apan mal᷊ihakka ratu udde sarun pateanna, tawe ringannu uahahati wuṛṛu tawe lai ringannu papangalo.”

Ratun banua sawannakka apan dal᷊eo

²¹ Mala'ekatta udde nabbisara apia, “Ratu manansunna apan mamarenta banuan sawannakka ateudde sangkatou lal᷊ebbone apan tawe suṛṛinone maola'a ratu. Arawe i tou sarun dumanta ringannu tawe niantimanna wuṛṛu mangaṛṛo aianannu raturingannu wawahia.

²² Al᷊awo'u tantara apan mando'appa si tou, ore wewe lai Imam Wahewalla, sarun insueanna wuṛṛu ṛimunsaanna.

²³ I tou nabbasangkallu manga paaire apan wakkute niolangnge ringannu manga walahanna waine. Wuṛṛu i tou sarun mabbal᷊i lembon matohassa, salaiwe i tou tumba'u uaparenta araratuanna addio'a.

²⁴ Ringannu mangnggalla i tou sarun mamangalo manga wageangngu leta'a apan masuwukka sutempo tumanangnge naapendamma mal᷊angnganna isudde. I tou sarun ma'ola'a walate apulun naungnge apan taambe saran paassa niola'u iupungngu al᷊amonane. Wua'udde i tou sarun mattahia su manga mananamba'ane al᷊awo'u saranapa apan niaaṛṛo wuṛṛu paa'ala apan nisombanganne sulal᷊ummu pangalo. I tou sarun mangatokku aalla tadea'u ipamangalo manga tampa apan pia tanda'a watune, arawe tempone mal᷊ihakke sarun masue.

²⁵ Wua'udde ringannu waṛṛani i tou sarun mallanginnu tantara apan wahewalla ipamangalo ratun banua timukka apan nasaddiate lai inai mando'appa si tou ringnanu tantara apan matonassa wuṛṛu manambo atonna. Arawe ratun banua timukka tawe maataṛṛangnga ana waugu i tou niawusuanna.

²⁶ Manga mananantirone apan aranianne ringannu tou sarun mapaanawon tou. Manambo suwallattu manga tantarane sarun niapate, wuṛṛu tantarane sarun insueanna.

²⁷ Wua'udde darua ratu udde sarun uma'ianna su sambau medda wuṛṛu umanna suadio'a, arawe itarua pia pandumma lal᷊eo, wuṛṛu itarua mangke uawawahia. Arawe ṛiinni tarua tawe maola'a ana waugu tempone taambe nia'omanna.

²⁸ Wua'udde ratu na banua sawannakka sarun mapul᷊e watukku wanuane ringanu al᷊awo'u saranapa apan niaaṛṛo apan niasombanganne. I tou nassalu tadea'u makkimunsa'a agama apan pangngimanannu umattu Ruata. I tou sarun ma'ola'a sarangkanambone wua'udde mabbelengnga watukku wanuane sassane.

²⁹ Manga pira tempo wua'udde i tou sarun mamangalo wanua timukka apia, arawe pangillul᷊eanne wal᷊ine waussu niola'a paarorone.

³⁰ Ana waugu manga taumatan Roma ringannu manga apalle sarun dumanta wuassu Siprus wuṛṛu mamangalo si tou, na'oman sara i tou mangngiladdu atata'utta. Wua'udde i tou sarun mapul᷊e ringannu mandona atonna wuṛṛu mattinsahadda madde'a makkimunsa'a umattu Ruata. I tou sarun maddaringikka tatantiron mangitou apan buatte nabbasangkallu agama udde.

³¹ Wua'udde i tou nangirimmu tantarane iapal᷊al᷊eo Wal᷊en Mawu. I mangitou sarun mamappassa sasamba miallo-miallo wuṛṛu mapararisikku sambau apan maata'utta apan isassaggo Alaleo apan makkimunsa'a.

³² Ne ringannu aallu ratu udde sarun massal᷊o'u manga taumata apan buatte nanantangngu agaman mangitou tadea'u mappulu massumbala si tou. Arawe manga taumata apan matuṛṛutta Ruata sarun waṛṛani lumawangnga si tou.

³³ Manga taumata apan pande mamiaṛṛia'u tumanangnge sarun ma'ola'a manambo taumata maasunna. Arawe su manga pira tempo al᷊annune, manga pira suwallatti mangitou sarun iapate ana waugu pangalo wuṛṛu putungnga, wuṛṛu manga pirang katou lai sarun pangaṛṛoanna wuṛṛu niatawanna.

³⁴ Tantal᷊anna pamamate udde iappaamatta, umattu Ruata sarun maasomba addio'a sasumbala, arawe manambo taumata sarun maammulla ringanni mangitou tumba'u ana waugu hausanni mangitou sassane.

³⁵ Sambageanganna wuassu manga piaṛṛa'a apan pande udde sarun iapate, arawe udde tumba'u sambau sasal᷊ua'tta su taumata ma'oman sara i mangitou mabbali waresi. Olangnge udde sarun mariaddi maddatingngu pangudussannu tempo, eteudde tempo apan buatte nitantunnu Ruata.

³⁶ Ratun banua sawannakka sarun ma'ola'a walate apulun naungnge. Ringannu mawunga i tou sarun mabbisara manungku i tou manggewal᷊anne wuassu al᷊awo'u monganna, ewe'e lai manggewal᷊anna wuassu Ruata Apan Atanggaṛṛanne. I tou sarun wotongnge ma'ola'a ma'oman sara asasa'un Duata masue. Ana waugu apa apan buatte nitantunnu Ruata udde ṛinone maola'a paarorone.

³⁷ Ratu udde tawe ma'ellega al᷊awo'u monganna apan sassubbannu iupungngu al᷊amonane, nasutta lai monganna raddaloannu manga wawinne. I tou tawe ma'ellega manga monganna udde ana waugu i tou massunna watanganne maggewal᷊anne wuassi mangitou.

³⁸ Arawe mawal᷊i'a, i tou sarun mangaddata monganna apan taambe saran paassa sassubbannu iupungngu al᷊amonane, eteudde monganna mandariaga manga tanda'a watu. I tou sarun mangonggollu wul᷊awanna, sal᷊a'a, permata wuṛṛu manga sasamba mapia waine su monganna apan taambe saran paassa nisubbannu iupungngu al᷊amonane.

³⁹ I tou sarun mamile manga taumata apan massubba monganna awagananna, tadea'u ipamangalo manga tanda'a watu apan matohassa. Isai apan manga'u monganna udde sarun onggol᷊anni tou aaddata wahewalla wuṛṛu manara apan matanggakka see leta'a maola'a lal᷊antakke.

⁴⁰ Napawe panguddusannu taṛṛinon ratun banua sawannakka maraniten a'omanna, ratun banua timukka sarun mabbal᷊issa pangalo udde ringannu masaddatta. I tou sarun mapasabbangngu manambo keretan pangalo, awal᷊o wuṛṛu apalla. I tou sarun mamangalo ere manawangnga, wuṛṛu manggaṛṛo manambo wanua.

⁴¹ Ewe'e lai leta'a apan maṛṛansangnga sarun pangaloanne lai, wuṛṛu pul᷊one su ṛiwune taumata sarun pateanne. Arawe manga araratuannu Edom, Moab wuṛṛu wageangnge apan ahunanne wuassu araratuannu Amon sarun masal᷊amatta.

⁴² Sutempo i tou napangaṛṛo manga araratuanna udde, araratuannu Mesir lai tawe mal᷊iudda.

⁴³ I tou sarun mangaṛṛo darotongngu Mesir ere inai wul᷊awanna wuṛṛu sal᷊a'a see darotongnga waine apan lembon maarega. I tou sarun sumbalaannu taumatan Libia wuṛṛu Sudan.

⁴⁴ Ana see watti'a wuassu ra'i wuṛṛu sawannakka sarun mamaṛṛindu'a si tou, ma'oman sara i tou sarun mapapangalo ringannu masaddatta wuṛṛu mamate manambo taumata.

⁴⁵ Ewe'e lai i tou sarun mapararisikku rasannu araratuanne suwallatu tahal᷊oangnga wuṛṛu wowone tampan Wal᷊en Mawu. Arawe wua'udde i tou sarun mate wuṛṛu tawe saran sangkatou lai apan wotongnge mangontolla si tou.”