DANIEL 1 - WUKE SUSI WATTI'U AL᷊AL᷊USASSA

WATTI'U PABBIAṚṚANNI DANIEL WUṚṚU MANGA HAWENE 1:1–6:29 Manga umbasannu Yahudi su wal᷊en araratuanni Nebukadnezar

¹ Tallu tonna napawe Ratu Yoyakim buatte namarenta Yehuda, Nebukadnezar ratun Babel, namangalo watukku soa Yerusalem wuṛṛu nalliwunna soa udde.

² Mawu namalan tou namaddon Ratu Yoyakim wuṛṛu nagaṛṛo sambageanganna wuassu manga saranapa apan marega su Wal᷊en Mawu. Manga taumata apan niatawanne, niapiddi tou watukku kuillu monganne su Babel, wuṛṛu manga saranapa maarega apan niaaṛṛone, nisahipunna sulal᷊ummu manga gudangngu kuilla udde.

³ Wua'udde ratu namarenta si Aspenas, tembonannu amonannu wal᷊en araratuanna, iapapile wuassu wallattu manga tawanannu Israel manga pira umbsanna papapulunnu ratu ara'e pangangawannu papunna.

⁴ I mangitou ṛinone manga umbasanna apan tawe sangkulle. I mangitou ṛinone maṛṛamaga, matanggakka si'ol᷊ane, pande wuṛṛu assingkanne manambo see lai wotongnge mammanara sulal᷊ummu wal᷊en araratuanna. Aspenas ṛinone manantiro si mangitou mabbasa wuṛṛu mamoṛṛettu sinaukku Babel.

⁵ Ratu nanatunna lai manungku anna wuṛṛu ua'en mangitou ṛinone uasul᷊ungngu pabbawiakka apan nissaddia su amonannu ratu. Napawe buatte niaaṛṛaanna sulal᷊ummu tallu tonna, i mangitou ṛinone sumaruanna ratu tadea'u mammanara su wal᷊en araratuanna.

⁶ Suwallattu manga umbasanna isudde lai Daniel, Hananya, Misael wuṛṛu Azarya, sarangkanambone wuassu ṛuanganni Yehuda.

⁷ Tembonannu amonannu wal᷊en araratuana namal᷊u manga aranni mangitou nabbal᷊i: Beltsazar, Sadrakh, Mesakh wuṛṛu Abednego.

^8-9 Ringannu tul᷊ungannu Ruata, Daniel iaakkanna wuṛṛu arangnguanni Aspenas. Daniel nassalu tadea'u tawe mandal᷊eo watanganne ringannu anna wuṛṛu ua'e anggore wuassu wal᷊en araratuannu ratu, ana waugu udde i tou naddorongnga si Aspenas tadea'u wotongnge masomba anna waine.

¹⁰ Ana waugu matta'uttu ratu, Aspenas nabbisara, “Ratu sassane buatte nanantunnu anna wuṛṛu ua'enu, nariaddi amungkangngu tumuṛṛuttu addapanne i'o aellehanna ere ola'u maradda'a wuassu manga umbasanna waine, natantunna i ya'u sarun pateanne.”

¹¹ Wua'udde i Daniel na'ireten olangnge su udde ringannu mandariaga apan niapamanaran Aspenas mangimbe si Daniel wuṛṛu siri tallu hawene Unni Daniel,

¹² “Annama'e i yami al᷊annune mapul᷊o allo; onggol᷊ete i yami tumba'u sayore wuṛṛu ua'e maola'a ana wuṛṛu inumanna.

¹³ Napawe mapu'ote allo, sul᷊unga'e wa'ikki yami ringannu wa'ikku manga umbasanna apan u'anna pabbawiakka apan nitantunnu ratu, ana see panganute inaappuanne su ola'u apa aellehannu udde.”

¹⁴ Mandariaga udde niumire wuṛṛu naannampe mapul᷊o allo al᷊annune.

¹⁵ Napawe tempone udde nasuete, i mangitou aellehanna lembon su lal᷊umanna'a wuṛṛu mattohasanna wuassu anambon umbasanna apan buatte naasomba anna wuassu meddan ratu.

¹⁶ Nanattakka orassa udde mandariagga tate lai manaru si mangitou anna wuṛṛu ua'e apan nitantunnu ratu, arawe tumba'u sayore wuṛṛu ua'e.

¹⁷ Ruata nangonggolla su umbasanna siri appatta udde asingkatta wuṛṛu apande sulal᷊ummu aimpal᷊ukka wuṛṛu apanden passi'ol᷊anna. Wal᷊ine wua'udde lai si Daniel nionggol᷊an-Ne lai apande ipanal᷊a'an sondappa wuṛṛu wal᷊iawa.

¹⁸ Su panginsueannu tallu tonna tempo passi'ol᷊anna apan nitantunnu ratu udde, Aspenas nangapiddu anambon umbasanna udde sinumaruanna si Ratu Nebukadnezar.

¹⁹ Napawe uahahattote ringanni mangitou sarangkanambone, ratu naasingkatta manungku i Daniel, Hananya, Misael wuṛṛu Azarya nangillembo wuassi ngana'a waine sulal᷊ummu al᷊ummu al᷊awo'u manara. Ne i mangitou nanattakke mamanara sulal᷊ummu wal᷊en araratuanna.

²⁰ Suapan ratu mangapiddu hatto apan ipappandumma tal᷊aane wuṛṛu ṛingiranna, i tou naasilo manungku tatantiro wuṛṛu sasimbakka wuassu anambon taṛṛa si'atta see lai mapapanden pasangkadda su ahewallu araratuanne.

²¹ Daniel sidutu mammanara su wal᷊en arartuanna na'omam sara Ratu Koresh wuassu Persia namaddon Babel.